「黃紙仔」專欄的緣起……
中學時代放學後，麻甩的我不是跟父親流連鴨寮街（他是半個發明家），就是鑽進信和中心地庫的二手CD店、雜誌社。讀大學時更瘋狂，一天可以看五齣電影，家中放了一道牆的Sound track，我是喝信和流行文化奶水長大的，第一張Bjork、Frente、周杰倫CD都是在信和所得。
在信和留下的腳毛，絕不比在大業書店留下的少，其中地庫的「CD交易所」，就出現過無數奇人奇碟。選碟另類，老闆Carl唔Q理人，CD膠盒上貼上一張張黃紙仔，寫的除了是點評外，有時還附帶歌手的情史、對樂壇的冷嘲熱諷等，真心學到嘢。
直至大學畢業入了報紙財經版一段日子，我才恍然發現「CD交易所」三位股東除了Carl另外兩位就是我的上司，原來由細睇大的黃紙仔就來自他們的手筆，特別是與我臭味相投的陳行。
2017年，屹立信和27年的「CD交易所」作古了。交易所三子成了大叔，黃紙仔不復見，我也沒有再逛信和了。
記得臨別時，Carl 接受訪問講過一段話幾有趣：「音樂就好似情人，唔會同你嘈交，唔會怪你差。人愈大，聽得愈多音樂，就好似識多個女朋友咁。就算你變心，鍾意咗第二隊樂隊、第二種格調，佢唔會嬲你而離開你。」我幾想駁嘴：仲有，你會令女友懷孕，好音樂只會令你自己耳朵懷孕，安全好多。
講咗咁耐，我都係想講，我懷念這些啟發過我的黃紙仔，猶如我懷念香港的 good old days。
日日loop咁多無温度的電腦字，不如睇下有歷練樂癡温馨推介他情人s的「大叔體」。男人的浪漫，何止豆腐火腩飯？Old school never gets old……
（陳行的「黃紙仔」專欄逢星期日文化者專頁刊出）
編按：唔好以為音樂情人有好多情人，我懷疑其貌不揚的陳先生仲係”處”………於尋覓初戀的階段。
撰文：鄭天儀
「The Culturist文化者」創辦人、大業藝術書店主人