《職人阿港- OT怪異集》
踏入農曆七月，鬼門大開。 作為打工仔，應該怕人多過怕鬼，不過當公司淨返你一個人OT時⋯⋯ 職人阿港連續幾期分享親身經歴，真人真事，如果驚就慎入：
話說當年荔枝角工業大廈裡面工作，有一晚OT，同事們背對背坐，同事A突然大叫「阿X, 唔好再推我張櫈啦！」而本來坐喺同事A背面嘅阿X係請咗假，同事A話聽到有人笑先大聲鬧…….嗰晚係星期三。
之後有一晚，職人阿港要負責完成一個project第二朝present，公司同事走晒，阿港無幾耐聽到有啲雜聲，心諗都係啲工廠大廈喉管或附近機器之類嘅聲音，之後做到大約零晨兩點左右，有一把好低沉聲線，貼近喺耳邊：吓⋯⋯（霞音），之後有幾吓女人笑聲，即刻打咗個冷震，再諗起同事A件事，非常驚，即時想走，但因為幾小時後要present，全身毛管㢥情況之下不停說服自己：係工廠啲機器雜聲，唔好亂諗！唔好亂諗！
終於天光，有同事返公司接手，嗰刻就知道職人阿港意志力同奴性係可以戰勝一切，而嗰晚又係星期三。
隨後，「詭異星期三」傳到老闆耳中，結果寧願重金禮聘班人做法事都無加過受驚嚇同事一丁點OT錢心理補償，多麼悲哀的打工仔。
（「職人阿港」專欄逢星期四文化者專頁刊出，敬請關注）