世事奇妙往往較世界奇妙物語更奇妙，不得不借頭借路劃少兩張符講少兩張唱片都要講吓呢單嘢。話說9月初喺文化者黃紙仔專欄報話丹麥影音廠牌Bang & Olufsen (B&O)有個不一樣嘅黑膠唱盤Reissue計劃，令好多人半信半疑，質疑係唔係真㗎？
.
當時，其實自己剛剛為朋友將一架1980年代中期出廠嘅B&O Beogram 8002唱盤徹底復修，即係將全機所有機械部分至電子線路版完全修復正常。過程中正在驚嘆幾十年前這廠牌Analogue音響技術、精細造工及當時設計師Jacob Jensen設計上如何令人嘆為觀止時，撞正公司本身啟動這Vintage Workshop 推行類似活動。由於我非專工維修技師，上一次為信和中心小店修理唱盤已是十年前，所以成單嘢喺時間上嘅巧合令到自己O咗咀，頻頻暗叫邪釘。然而，一間被市場認定難敵科網發展洪流、業績久沉不起而前景方向完全陷入迷惘嘅公司，今次反常舉措其實幾值得細心思考。係想標尾會速賺一筆？想構思新去向為業務救亡？為做Branding搞宣傳？其實為乜呢又？
.
睇兩條片先：
//
https://youtu.be/RDZB_E39k2c
//
https://youtu.be/ecdn_otUbzc
.
如果你冇睇上集，可能唔知我講乜。其實B&O上月公布，會用某啲方法將他們的若干經典產品重現於世。以黑膠唱盤為例，其實就係預先暗中喺二手市場買入一批同型號嘅B&O Beogram 4000款式唱盤，由工廠的工程師、設計師及技工將全部機復修及更新元件，再限量推出市場發售。
根據最新發表嘅資料，呢一批唱盤外殼上嘅鋁質面板及轉盤，由工廠重新修葺及電鍍為微微香檳顏色。機殼原來的紅木外框會用全新橡木重造更換，也會配上全新嘅亞加力透明防塵罩。
.
至於電子部份，除更新所有電解質電容及個別消耗性元件之外，也加入了一份R I A A前級放大，令唱盤可以與現代的其他廠牌擴音機及至B&O的新世代有源揚聲器(Active Speakers)配合使用。當年設計上具革命性意義嘅直臂循跡唱臂及光學監察臂，除改為型格啞黑色之外，唱頭也換上了全新的。由於公司已經超過30年沒生產原裝MMC1-5系列唱頭，現時即使斷針的廢唱頭動輒也要以千元港幣為單位，所以估計可能會選用別家工廠，英國的Soundsmith或丹麥的Ortofon唱頭代替。
.
好嘞，你最想知嘅問題。一架1972年推出時賣160英鎊機齡近五十年嘅二手唱盤，經原廠修葺、更新零件及加補品後，會賣幾錢呢喂？正確答案係9000英鎊，即係差唔多要十萬銀港紙。你想話貴？揾鬼買？其實廠牌方面只係會賣95架，用嚟慶祝B&O 創立95周年。唱盤10月12日會喺個別店舖展出，到19日開賣，據報暫時只係for歐洲市場，正所謂你想要都未必有，到時絶大機會好似地產代理咁搶唔到盤囉⋯睇怕。
其實，B&O面對影音市場消費模式及軟硬件更新經營模式改變，即使在中港資金入股前後，過去似已迷失咗一大段時間，向中檔耳機及Music Player發展亦僅是杯水車薪。過往有不少市場人士選擇揣測他們重推昔日光輝產品，實行跟音樂媒體市場一樣食老本。然而，經過幾十年停產之後，要斥巨資更新所有模具及重啟昔日生產線，再跟當下產品工廠流程融合談何容易？今次以二手機由原廠購入翻新，再重新包裝出售的技法，本小利大兼又環保，設計理念又帶啲啲Martin Margiela創作況味，你話幾型幾咁豈不快哉呢呵！
.
事實上，月內推售「全新」的Beogram 4000c ，只係整個先導計劃嘅頭炮，之後陸續會有哪些其他經典還魂重生？大家不妨自己估吓。係Beomaster擴音機？又抑或喇叭呢？唯一不可能嘅，應該係佢哋啲八九十年代舊款顯象管電視啩！而在不知不覺中，二手市場中比較Iconic嘅產品已經開始尋寶活動，其實已暗地加價。
.
雖然我哋會睇死呢類型小規模銷售計劃，聽落10萬蚊一架好似好貴，但成件事結果收益唔夠一千萬港幣，做marketing已經冇晒。產量始終受制於二手市場的「原料」，只屬於品牌形象及宣傳活動，睇怕能成大器。但其實活動令品牌有一個測試市場，說服公司管理層諗清楚自己未來想點嘅機會。大家睇到呢度其實都冇留意，仲有五年就係佢哋廠牌創立一百周年。正所謂好多嘢出唔出？好多大嘅決定亦可能要決定，大家拭目以待。
.
又之不過，想忍住唔講但忍唔住要提嘅係，阿各位B&O高層，其實要Know Your Product囉，你哋搞到咁大壇大龍鳳，要煲大Beogram 4000有幾經典嘛，但你嗰批4000c唱盤其實全部係4002嚟喎。兩架機由外表到內部都有分別，最簡單易見嘅係右手邊Control Panel 中間啲掣。4000係中間方型上下左右㩒；4002至係直條掣。你當然可以拗話你哋知，都係4000大系列下面之嘛。不過你哋玩細節，要屋盡量細心囉我覺。講完！
⋯⋯ 死嘞，收人咁Q貴稿費，變咗唔講音樂講音響，仲幫人哋上市公司獻計添！得唔得㗎？死人都要潦番兩張黃紙埋尾嘅。今次講兩條女嘅古仔，一個法國妹一個英國妹，一個你識一個唔識。兩姐事業線同生命線有何異同？細節自己睇自己領會。
.
講清楚 你鍾意Carla Bruni啲乜？
Carla Bruni
Carla Bruni
阿布魯尼小姐第6張大碟，自撰自彈自唱，就算係唱片入面嘅小小踏腳聲，都話自己用心編排過。法文堂時間，以下首Quelque chose即係Something咁解。嗱嗱嗱，就係喜歡佢呢種幾乎純粹用氣，驚死觸動聲帶，嘢嘢都好似情人耳語嘅唱法。家陣面口唔得？關乜事呀又？
https://youtu.be/g-qvPsVxEgI
//
執多劑！Grand Amour ，唔使解啦吓話：
https://youtu.be/A_PJ1rACshg
.
68歲邦女郎緬懷舊時會唱啲乜？
Susie Vanner
In These Shoes
1977年出演The Spy Who Loves Me肉搏羅渣摩亞上位成邦女郎，43年後千帆過盡自己重唱當年電影主題曲Nobody Does It Better 。會係點感受？你話呢？
https://youtu.be/IGZWSVur9Tk
//
聽佢唱Lou Reed嘅Walk On The Wild Side ，其實唔係好忍心睇個MV。希望係自己諗多咗啫。
https://youtu.be/OAoYA-9YxF0
