今個禮拜如果唔抽甘小文同螞蟻招股水，睇怕返到屋企都會畀阿媽冚兩巴掌。嗱，我知你當然有N咁多種角度去影嗰幾幅肥婆四哨牙珍，但期間要聽乜嘢音樂配襯最好Feel？今期仲會介紹一位來自土星嘅騎呢爵士大師。又另外，九月時率先同你地講阿坂本龍一嗰盒Art Box Project 2020S，終於訂好價下年三月上市，正式開始國際配售啦！幾錢？四手螞蟻囉！
去西九龍中心目及女應聽乜嘢音樂？
Andy Williams
Music To Watch Girls by
雖然歌王安迪威廉斯為人敦厚，不過喺呢個由有心人泡製嘅Unofficial MV入面，呈現一個又一個又或者一大班色迷迷嘅男人，肆意咁用眼睛欺凌女性，雖則古老電影片段珍貴，但片中女士明顯「衣著太暴露、姿勢不雅觀、子女睇到後會感到不安，發放信息亦可能為學生帶來不良影響」。點對得良心住吖你哋話？講到咁，很肯定大家唔會睇啦吓話？
https://youtu.be/E7iXpTJk15s
//
以下係1966年Bob Crewe Generation呢首The Music To Watch Girls By嘅原裝純音樂版本，我個人認為更加有Feel。至於呢個山寨MV用埋內衣show畫面，啲Model一個二個打出晒嚟⋯⋯咁滯，就更加咩嘢嘞。我睇完之後內心都非常不安，大家真係要睇吓佢哋幾咁過分至得！
https://youtu.be/s0lNMWvsY28
//
阿施主你話想正正經經聽吓呢首咁Groovy嘅音樂？明嘅，咁唔該你畀心機睇住個唱片封套聽嘞。
https://youtu.be/AndnVOil0rQ
來自土星的Free Jazz大師玩轉Standard金曲
Sun Ra & His Arkestra
Unity
阿土星人大師同佢隊Arkestra(佢堅稱黑人讀Orchestra 係咁樣發音，唔係我講㗎吓)喺呢張Unity 現場錄音大碟入面，有演繹電影仙樂飄飄處處聞入面金曲「賣飛佛丁時」，電子琴行頭嘅Improvisation 流水行雲焚焚聲，兼仲有磅未來世界味。一九七幾年嘅Live ，今時今日聽亦完全冇過時，呢啲咁就係堅囉。
https://youtu.be/G7YpsDrZAPo
//
喺1976年蒙特勒爵士音樂節上面，睇佢演奏威靈頓公爵嘅Take The A Train ，咪睇佢同隊樂隊一身古埃及人騎呢打扮，傻唔晒㗎真係。
https://youtu.be/k341z3dsXy4
//
仲有，Sun Ra堅係拍過戲嘅，當中佢同佢班隊友都唔使着咩戲服，着番平時嗰啲做返自己已經搞掂。唔信睇吓1974年套Space Is The Space條預告片：
https://youtu.be/Fgz-iQ5lSw4
//
家陣提失業好唔老嚟？去外太空招聘代理試吓有冇運行啦不如！呢條片好反映到呢位大師N年前已經無厘頭到極點。
https://youtu.be/Z8nppTSY-Rs
威猛樂隊日本細碟大全 去到有幾盡？
Wham!
Japanese Singles Collection – Greatest Hits –
今次套碟入面張DVD三個㗎仔廣告之一，兩條茂利親自上陣，將早期首本名曲Bad Boys歌詞改到鬼五馬六，兼仲自己唱番。至於當時用幾多￥可以令佢哋去到咁盡？我幫你問吓死鬼George Michael呀吓。
https://youtu.be/nxwO8qV5c0o
//
另一首慘被蹂躪嘅代表作係Freedom，啲核突新歌詞古靈精怪，又冇唱出萬勝牌錄音帶個招牌，咁重新填嚟做乜Q呢？等我又試吓問埋阿「咪膠阻住」，叫佢直接揾你覆你先吓。
https://youtu.be/0zVpm3fUKfI
癲過螞蟻！教授全盒國際配售價萬七蚊
Ryuichi Sakamoto
Art Box Project 2020S
本來一心諗住今期寫三張碟算數，點知臨尾殺出個坂本龍一。我九月同大家介紹嘅嗰一盒唔知係Art定係呃嘅盒裝唱片終於落實上市細節兼訂好價。20萬日圓，我冇講錯你冇睇錯。當中包括五張白色膠大碟同兩張細碟，較上年嗰盒成萬銀嘅七張大碟一張細碟仲少咗唱片，不過多咗個緒方慎一郎設計、用料來自宮崎縣諸塚村產桐木製嘅木盒，同埋由陶藝家岡晉吾謹製並由教授上色嘅陶碟⋯⋯碎片一塊。咦，寫寫吓突然覺得好似背緊食神啲刻骨銘心骨頭鍊錘對白咁嘅？咁樣啲唱片包括乜嘢音樂呢又？自己睇啦。確實係全部冇出過街，想聽嘅話要撲兩皮嘢返嚟。以下連結嘅招股文件，有埋中文過你睇，窩心嗎？
//
坂本龍一| Art Box Project 2020
https://shop.mu-mo.net/st/special/rsartboxproject2020/contents/?jsiteid=CMM
黐孖筋！堅寫卅年財經教人理財，掌聲反而唔及匿喺信和中心偷寫十年黃紙仔推介古怪音樂電影導人升仙。其實都明嘅，成世人個劇本唔到你話事，但配樂都叫做有得你揀嘛。
