專欄 黃紙仔

黃紙仔音樂畫符 – 陳行 #58【專欄】

唔是影評  因為根本冇套咁戲 
暗黑超人Vs極簡主義電音人

超人復活「知」死: 幕後好睇過幕前

Jon Schnepp (Director)

The Death of Superman Lives : What Happened?

某年輕小朋友冇見一排,興高采烈寃住講4粒鐘Zack Snyder 版《正義聯盟》有幾巴閉幾震撼,話揭露荷里活權力鬥爭複雜結構,又話最正係暗黑Tone裝束嘅超人等等等等。作為老海鮮嘅我照例潑冷水,倒番轉頭問佢知唔知曾經有過套超人電影由添布頓導演兼由尼古拉斯基治主演?喂,珍珠冇咁真喎真係,美國影評人Jon Schnepp喺2013年曾經透過眾籌網站成功製作紀錄片,訪問晒添布頓同埋編劇監製一干人等,就嗰單嘢互插互隊互卸,仲展示大量人物設定、場景設計圖片以至老Nich試造型影片。結果,呢套事前吹到老年咁大但喺正式開鏡幾星期前叫停嘅不存在電影,究竟點解胎死腹中?喺阿Jon呢套紀錄片睇見幕後鬥爭嘅精彩程度,絕對可能好睇過套戲真係拍得成。唔信?嗱,添布頓原本根據1992《超人之死》漫畫系列方向設定,Superman一頭長髮、有幾款唔同造型,但都係暗調裝束取消紅底褲、胸前S字變圖案化。化身平日嘅Clark Kent外型頹廢愁容滿面,唔知自己係外星人,更要承受社會歧視及工作壓力。好正喎呵?結果監製Jon Peters介入諸多建議,要求超人改着籃球短褲、唔要識飛之外,要加隻Gay嘅R2D2物體,結局仲要超人大戰巨型蜘蛛⋯⋯嘩!點埋尾呢又?結果咪咩嘢囉。家陣全套紀錄片唔使磅水Download,就咁畀過你睇,不過冇中文字幕,法文字幕應該難你唔到啦吓話:

極簡主義電音人藉呢喃同你看得失

Taylor Deupree

Mur

N年前已經畀坂本龍一同David Sylvian讚到天上有地下無嘅美國Minimalist Electronic 音樂人Taylor Deupree,新大碟有佢招牌精心炮製嘅格式化氛圍,亦都有雕琢美輪美奐嘅旋律同唔同程度嘅Field Recordings 配襯。全張唱片5首作品都係M字頭R字尾,佢話自己音樂吟吟沉沉,用Murmur個字形容最好。我就覺得今次張碟嘅音樂,不知不覺會將你帶到一個幾乎完全停滯嘅時空入面,等你慢慢反省思考。至於去唔去得到要睇你造化,先到先等啦咁,唔使嘟安心出行。

Mir :

Mor:

Mer :

(mur mur) :

Mar :

B&O業績靚股價上  有賴設計玩外判?

Bang & Olufsen

Beosound Emerge 

人老咗心態自然唔同,對於B&O,由二三十年前嘅Fanboy等出新嘢買,變到家陣想放長雙眼睇佢公司點扭轉先前劣勢多啲。就喺佢哋推出最新書本型(唔係書架型呀) WI FI喇叭Beosound Emerge之前,睇咗佢哋最新季度業績。喺疫情之下收入錄得雙位數增長,現金流連續兩個月正數。管理層除咗例牌講銷售策略得宜之外,強調厲行Cost Reduction Programme ,目標要喺年內節省1.75億丹麥克朗,折合兩億幾港紙。亦可能因為咁,頭先講嗰部新嘅Beosound Emerge同上一架Level一樣,繼續同倫敦設計公司Layer合作。唉,由B記殿堂級設計師Jacob Jensen經歷到David Lewis嘅你同我,對於強如B&O都要將設計外判當然唔會老嚟,之不過你睇番佢公司股價由52周低位升咗三倍,畀你做CEO你話點揀先?

Beosound Emerge 官方介紹短片,艾羅補腦汁提提你,呢隻喇叭只係單聲道,要立體聲要買兩隻喎:

以下呢條片講解點樣Set Up同埋平日應用,雖然貴版玩木紋Finish設計未必個個啱,不過對佢哋嘅Class D喇叭技術從來有信心。雖然Emerge 本身Footprint 細,但三路分音有4吋60W低音,「焚」起上嚟應該都唔講得笑:

從來都係玩鬥氣,特登搵一條當年設計師Jacob Jensen點樣講B&O Design嘅片俾大家睇吓,緬懷一吓。其實個設計概念入面已經包咗產品銷售目標同營銷策略:

廿年首張Live  Norah Jones純為頂癮

Norah Jones

…‘Til We Meet Again

原本Norah Jones咁大路嘢兼有行貨嘅,當然唔輪到我去寫。之不過,畀大小姐喺宣傳時講嘅一句說話觸動到心靈。佢話:「唔止你哋,作為藝人嘅我都好掛住玩現場。」講真,好 耐冇,好 恨睇「來路騷」呀喂!真係不知等到何年何月?講番羅拉今次現場錄音大碟第一張Single揀咗首比較近年啲嘅《It Was You》,錄音來自2018年加州嘅一個音樂會:

想要處女吓話?處女大碟第一首Hit嘅巜Don’t Know Why》現場版。唉,唔知點咁就廿年嘞:

冇畫面?又得!不過呢個上年嘅家居現場錄影,同今次講嗰張唱片冇關係,話之佢啦又唔係幫佢宣傳。呢首《Sinkin’ Soon》嘅懶Hea演繹固然係手掌拍爛,今次重點並非添咗唔少磅數嘅Norah,反而係佢後面嗰個唔知打緊乜嘢鼓嘅拍檔,來自加州嘅爵士歌手Sasha Dobson。小姐雖然冇開口唱,但係喺歌嘅尾段玩咗一段口技,完成估佢唔到。睇啦,真係好到冇 嘢講!

Sinkin’ Soon (Live from Home Feat. Sasha Dobson) :

0 comments on “黃紙仔音樂畫符 – 陳行 #58【專欄】

留言