藉住大衛寶兒《豹妹》澳洲版12吋大Single 醒個好Site畀過你
Cat People (Puttin’ Out Fire) (Australia Limited Edition 12” Single)
正所謂一百歲唔死都有新聞聽，真係冇諗過呢首自己叫做滾瓜爛熟兼䁱唱，由Giorgio Moroder搭大衛寶兒嘅經典電影主題曲原來有個咁嘅版本， 卅幾年來完全不知不覺認真罪過罪過。據講，呢張大single理應不存在於世上，不過當年陰差陽錯只喺澳紐出版過，之後絕版。唱片入面嘅9分幾鐘版本《Cat People》，最精彩嘅係並非一般1980年代例牌頭接尾尾駁頭揼波鐘拖長Extended Version。雖然Bowie嘅Vocal冇話唱多一段歌詞，但係就有多幾段分別用結他、電子合成器、色士風Solo同和音嘅原裝Session演奏：
大家慢慢聽，睇吓聽唔聽得出有乜唔同：
呢張咁正斗罕有嘅12吋大single，可以喺呢度下載高音質版本音樂檔案，要點樣填密碼同將檔案解壓，易過借火，自己睇啦：https://burningtheground.net/2021/04/david-bowie-cat-people-putting-out-fire-australia-limited-edition-12/
其實，一心係想透過呢張唱片，介紹以下呢個超正嘅網站，利申先，完全冇收廣告費㗎！話說喺美國奧克拉河馬洲長大嘅DjPaulT本身係1980至1990年代流行音樂樂迷兼12吋大Single收藏家，自2007年喺Blogger開始出Post，分享自家珍藏嘅大Single，將唔少絕版黑膠唱片轉化成音樂檔案上傳，再搜尋資料撰寫簡介供同好下載。初時由於本身唔熟硬件，用嘅器材渣斗兼夾Rip碟技術唔掂，即使唱片全部係自己珍藏而又免費分享，一樣畀人鬧檔案解像度唔夠Hi-Fi。經過不停嘅Trial and Error逐步更新軟硬件及研習Rip碟技術，到今時今日佢網站已有百萬計固定瀏覽客。雖然反應好，阿Paul冇諗過發大嚟搞，每年只有兩次募捐行動，不時亦只會因為唱針或者器材損耗而尋求小額資助。可能你會問，佢逢星期一至五每日嘥幾個鐘頭搞啲咁嘢發唔到達，一搞搞足十幾二十年又上唔到市究竟有乜Q意思？嗯，呢吓咁樣嘅思維咪正正就係香港嘅問題囉！
Burning The Ground Site : https://burningtheground.net
咁樣《豹妹》套戲叫得做Erotic Horror，正唔正？我會話，全套戲嘅焦點全部喺晒女主角娜塔莎金斯基身上。故事、男配角馬康麥度維、特技，算啦。唔信自己可以睇吓條Trailer ，當然最重要嘅嘢呢度冇得你睇：
Neo-Classical貴公子 靜態鋼琴塵世美
Akira Kosemura (小瀬村晶)
88 Keys
之前介紹過嘅80後日本新古典派作曲家小瀬村晶，雖然出身唔錯而事業又一帆風順，但同大家一樣因為疫情及日本政府頒布嘅緊急狀態令影響到日常生活。不過佢冇Hea冇借故頹廢，反而趁住機會做一樣咁多年來一直想做但都冇做過嘅嘢：正正經經寫好琴譜再彈奏灌錄Piano Solo唱片。由於過往一向只基於心中半完成概念而即興彈奏造音樂，今次嘅長時間細心雕琢，令佢嘅音樂呈現出前所未見嘅另外一面。我就覺得喺甜美音節入面更加凸顯出嗰份日式嘅無奈同落寞，大家又不妨聽一聽係唔係我諗多咗：
The Eighth Day (Official Video) :
喺以下呢首作品入面，大家可以聽到佢專登錄埋入去嘅空氣同周遭環境聲音，甚至中段每一下敲打琴鍵之間嘅遲疑，帶出某種佢特有簡潔嘅憂鬱：
Nothing Stays The Same：
唔夠喉？整多首。88 Keys大碟入面擺喺尾嘅作品，雖然只有1分40秒，不過調子好易記又非常動聽，有少少佢行家Goldmund嘅影子呀呵？
By Night :
貝魯特低音提琴手領軍 五重奏瀟灑抗逆
Makram Aboul Hosn
Transmigration
近幾個月，差不多每張介紹唱片嘅製作過程都牽涉到疫情影響，其實除咗所謂疫症之外，世界上有好多人經歷更加慘痛事件困擾。就好似黎巴嫩Bassist阿Makram Aboul Hosn咁，千辛萬苦申請到藝術基金撥款，打算去歐洲搵自己最鍾意嘅樂手創作首張個人大碟，最後見到家鄉戰亂經濟重創，同行冇工開，決定改為投資本土製作。興高采烈Book好地方開Band錄音之前三日，貝魯特再發生恐怖港口大爆炸。佢當時諗過，全國慘痛到咁，仲點錄呀？結果，佢哋商議決定與其大家牛衣對泣，倒不如盡己所能將沉重嘅心情演化成瀟灑嘅旋律，勉勵世上有需要嘅人啦。喺咁嘅情況下，呢一張定名為《輪迴》嘅唱片誕生。以下揀選咗3首作品畀大家聽吓，大碟基本上以五重奏方式演繹，但樂器某啲時間去到11種。風格以Jazz同Swing為本，夾雜咗Blues、Africanna，仲有啲Boppish 。面對複雜嘅編排，大家要留意一下身為領班嘅Makram ，功架絕對唔少嘢！
Ever-Recurring Story of September :
Becha Sting :
Someday My Prince Will Come :
13幅Edward Hopper變一齣戲 Sylvian獻聲
Gustav Deutsch (Director)
Shirley : Visions Of Reality
鍾情Edward Hopper嘅油畫，尤其迷醉於感受凝固畫面背後潛藏嘅澎湃張力，畫像之前和之後嘅故事情節從來只會圍繞觀看者腦內推敲細味。講起已經係2013年嘅事，奧地利導演Gustav Deutsch就揀選咗13幅Hopper油畫作為場景，創作故事貫穿拍成電影，明知不可為而為之，膽量之大前無古人。電影音樂方面，佢揀選Christian Fennesz及David Sylvian作品配襯，更加出人意表：
以下呢兩條電影預告片其實等於濃縮版嘅Making Of製作特輯，大家可以了解一吓創作及拍攝過程。當然，睇慣商業電影嘅你，可以從中考慮清楚繼唔繼續睇落去。值得一提，Trailer入面你聽到嘅，確實係David Sylvian嘅《Small Metal God》：
好嘞。諗清諗咗頂得順吖嘛？家陣全套戲由頭到尾畀晒你睇，YouTube有提供Closed Caption英文字幕。如果感覺畫面質素唔好嘅話，呢套戲有推出藍光碟，甚至有中文字幕嘅台灣版：
