賀David Lynch開工大吉 祭Serge Gainsbourg收皮卅年
根據迷離大導大衛連治推介佢教人冥想嘅作品《Catching The Big Fish》所言，做創作嘅人企喺淺水地方只可以諗到小念頭，想要捕捉重大意念或者想法，往往要向內心潛深一啲。偏偏，佢老哥崇尚夢嘅邏輯，迷醉於佢電影世界通常會沉溺到無法自拔，兼且生生世世。距離上一部電影《Inland Empire》足足15年之後，佢今個月終於開工拍嘢，我等忠粉固然勁興奮，想搞番少少回顧，但又唔想咁正路，終於喺回憶入面發掘出一堆埋藏超過十年似有還無嘅夢魘同大家分享。喺以下歌曲入面，各位會徹底明白之前講夢嘅邏輯係乜嘢意思，如果你係粉絲嘅話應該會不斷發現驚喜。
趁大衛連治新作開工重溫18個噩夢
Various Artists
Mashed In Plastic : The David Lynch Mashup Album
//
2008年，呢班包括三大洲好多唔同國家連治粉，唔單止用盡心力用經典電影對白同配樂二次創作心目中最理想嘅Lynchist概念歌曲同MV，兼仲整咗一整個網站嘅資訊同影片。雖然專屬網站已經關閉，不過依然留低有以下一條預告片：
Mashed In Plastic (Trailer) :
真係忍得好辛苦，但點樣都唔可以開估呢首歌搞乜嘢。本身係Lynchnut兼夾熟悉80年代流行音樂嘅你，應該聽得好過癮！
Wicked Wedding :
好嘞，你明嘞。基於上面嘅邏輯，又試吓估下以下首個搞乜？
In My Twin Life :
呢一Cut由阿大導自己獨白開場，教你創作上點樣去揾靈感，當然都係講番佢教人冥想嗰本釣大魚書啲嘢。跟住帶入去嘅係電影《失憶大道》入面西班牙版《Crying》-Rebekah Del Rio唱嘅《Llorando》。
The Voice Of Love Is Crying :
如果連《Blue Velvet》電影入面史上最強大佬Frank Booth你都唔識，真係好打有限！以下呢首嘢，係將大佬金句抽出整合而成。幾Upbeat㗎，Mummy⋯⋯
Frank’s Here :
如果熟我套路，都知道天道酬勤嘅道理。你捱得到嚟呢度，我全張唱片廿幾首歌連MV送晒畀你：
The Full Movie :
致祭Gainsbourg 要6首鋼琴Solo加6條女
André Manoukian
Le Pianos de Gainsbourg
嗱嗱嗱，就算唔識法文，齋係睇字母串法已經睇得出法蘭西才子Serge Gainsbourg喺下面首歌玩字玩食字諧音喇。負責演繹呢首1967年由Anna Karina原唱作品嘅，係大哥老相好、法國經典靚女、電影《情涙種情花》嗰個Isabelle Adjani 。大小姐喺1983年張處女大碟就係由Gainsbourg負責創作。如果唔係，近年隱咗形嘅佢未必肯出山唱歌。
Sous le Solei Exactement (w/ Isabelle Adjani)
呢一首《爪哇話》係阿大師1962年初遇女星Juliette Gréco，一齊飲住香檳聽咗一晚唱片(官方講法)之後寫畀伊人嘅。家陣由近年當紅爵士女伶Melody Gardot唱，佢應該收貨嘅。
La Javanaise (w/ Melody Gardot)
Gainsbourg另一首早期作品，當時應該仲係正常人一個，只不過呢首歌今次揀咗由年紀輕輕嘅Cemélia演繹，阿女嘅性感吟唱加埋唞氣聲同鼻音，再望吓個歌名⋯⋯咁樣處理啱㗎喇。
Black Trombone (w/ Cemélia Jordana)
以下歌名大致意思係：嚟同你講聲我走啦，又即係跟你說再見。首歌嘅旋律非常非常優美，如果有興趣，可以搵番佢自己唱嘅原裝歌唱版本比較吓。至於句法文，建議你抄低佢，話唔埋有一日叫起手有用。
Je Suis Venu Te Dire Que Je m’en Vais (Piano Solo)
德系浮上性電音三度聲戰丹麥結他王子
Ulrich Schnauss & Jonas Munk
Eight Fragments Of An Illusion
八塊幻像碎片，合成一次歐式電音體驗！不經不覺，原來德國仔Ulrich Schnauss同來自丹麥嘅Jonas Munk已經係第三次合作。今次雙方用咗三年時間，將各自最擅長嘅樂器運用同作曲編排心法擺上台，迸發出前所未有咁優美嘅樂章。層層疊疊的Synth 夾結他Patterns，令人覺得Uplifting之餘，你聽到嘅Widescreen闊銀幕景象可謂繞樑三日。嗱，呢度全張唱片總共8首音樂，一氣呵成醒晒畀你，堅係High到冇朋友：
大感動！日本手辦誌《SCULPTORS》中文版
玄光社/北星圖書
SCULPTORS 造型名家選集
其實喺廿幾年前，日本曾經出過《SMH》同《DDD》兩本手辨模型專門雜誌，可惜先後停刊。直至兩年前，玄光社旗下《SCULPTORS》創刊，可能受疫情影響，至今只係推出咗四期。最令人感動嘅係，台灣北星圖書事業有逐期推出繁體中文版。雜誌內容除咗有傳統手辦造型雕刻製作過程及塗裝技法講解外，更加新增電腦軟件創作及3D打印組件技術介紹。家陣後生仔淨係識打機，嘥心機砌模型嘅人少，玩手辦嘅更少。所以，大家真係要珍惜。北星圖書除咗呢一本雕塑家期刊之外，另外都譯咗幾本唔同嘅日本手辦大師作品，兼仲有相關課程以致材料提供：
SCULPTORS 造型名家選集 04：原創造形&原型作品集 造形的痴迷所在9789579559836
新紥師兄大山龍示範雕嘢，手法之純熟睇得出下咗幾多苦功：
雕藝進修之「玩腳」，不過你又無需要諗多嘅，呢度示範雕刻嘅係麻甩佬腳：
黐孖筋！堅寫卅年財經教人理財，掌聲反而唔及匿喺信和中心偷寫十年黃紙仔推介古怪音樂電影導人升仙。其實都明嘅，成世人個劇本唔到你話事，但配樂都叫做有得你揀嘛。
