藝術 音樂 黃紙仔 專欄 文化

黃紙仔音樂畫符 – 陳行 #61【專欄】

交投弱岀啲咁信號  係轉勢定大難臨頭呀喂?

(我哋用64年前101 Strings單個案做分析)

可能因為時勢唔好啦,荒誕事層出不窮。黑膠唱片制式復辟而卡式錄音帶再成風頭躉之際,N年前遭我輩唱片蟲嗤之以鼻嘅101 Strings系列「口水」音樂雜錦碟竟無視唱片業寒冬,換上型格包裝重現市場,一推兩張兼似會陸續有來,真真無諗嘢講嘞呢鋪!

吓,唔知乜嘢係101 Strings ? 可能問你老竇或者阿爺會識甚至幫趁過。話說1957年,電唱機同套裝Hi Fi開始普及,所謂Easy Listening 嘅輕音樂變成一般家庭、餐廳以致公共場所嘅基本「聲音」需要。美國唱片商人David L. Miller吼準時機,請咗三個樂師負責編曲,又平平哋簽咗兩隊喺德國冇乜人識嘅管弦樂團演奏,將當時最紅電影及流行曲改編成軟綿綿嘅輕音樂灌錄唱片。由於以價錢平又有齊熱門歌做招徠,Hit中一班要求唔高嘅普羅大眾要求,結果啲貨賣到開巷。1957年尾出完3張,跟住嗰年一出要出12張,印唱片變印銀紙,音樂出完翻渣再翻渣。條橋一玩玩咗卅幾年,至1981年出完披頭四抽水碟之後至冚旗,總計已經先後出咗至少150款唱片,銷量超過千五萬張。好嘞,家陣唱片行業冰封,突然見到呢兩張嘢浮出水面,你都咪話唔震撼。究竟係市況轉勢信號,抑或敲喪鐘?唔地除喎。之不過正面啲諗,可能過去廿幾年啲人用慣機撳掣創作流行曲,樂迷亦習慣只識留意節奏拍子而忽略咗曲調,家陣可以喺呢啲唱片度聽番啲優美嘅旋律同調子,正所謂唔識作都有得抄吖嘛!好多鬼頭玩音樂時都會Sample佢哋啲嘢㗎真係。

神隱40年  王牌口水樂團作品重演江湖
101 Strings Orchestra 
25 Easy Listening Classics Vol. 1
25 Easy Listening Classics Vol. 2

講咗咁耐,你未聽過101 Strings?唔使慌,家陣可以聽吓第一集入面翻玩木匠樂隊嘅《Close to me》,1970年代戲院、餐室又或者百貨公司通常就係用呢種音樂做BGM嘅。

呢首係Nat King Cole嘅 《Love Letters》,即管聽吓呢種懶洋洋又軟綿綿Hea到不能嘅演奏先,可能你啱聽喎。

跟住仲有1970年代熱門電影巜畢業生》主題曲《Sound Of Silence》,上面講過,你老竇又或者你阿爺可能買過呢亭唱片。一聽到你播呢啲嘢,佢哋可能會有激烈反應。又或者如果阿爺過咗身嘅話,都可能報夢叫你唔好再聽:

嗱,呢首再舊啲,擺明係要刺激你老太爺或者太公返嚟陪你聽!係作曲家Cole Porter 嘅《Begin The Beguine》。記得以前喺戲院廁所堅係聽過,諗起好似有啲急尿:

波爾多神手  一支古典結他 玩起18部戲
Thibault Calvin
Films
我當然明白你聽過千萬次梅林茂版本(尤其呢排重影4K版),又或者口琴版甚至清唱版嘅《花樣年華》主題曲,不過呢個法國仔用古典結他重新演繹嘅版本,絕對值得一聽。佢專登加咗段Improvisation 做枝節,又用Field Recording托底,不妨留意音樂近結尾時隱藏咗幾句廣東話對白,又睇你聽力過唔過到關⋯⋯唔係嗰句啦,你悶唔悶㗎 ?

Yumeji’s Theme (In The mood For Love)

絕對係Thibault 細個時聽過印象非常深刻嘅電影配樂,家陣佢用結他重新演繹德國電子音樂大師Giorgio Moroder嘅呢首《午夜快車》主題曲,更加用咗整隻結他唔同部分同唔同彈奏技巧模仿電音Effect,技藝超凡㗎真係!

Chase (Midnight Express)

《以你的名字呼喚我》套戲因為嗰個原因唔係我杯茶,只不過主題曲街知巷聞到冇認真聽過都已經識得。大家不妨又睇睇MV入面,阿哥仔點樣用唔同腳踏同開關一人表演,甚至搞特效配合彈奏,得㗎唔係講笑。

Mystery of love MV (Call Me By Your Name)

另一首可能係佢老竇教佢聽嘅音樂,《獵鹿者》電影主題曲,儘管佢喺主線以外增添咗唔少徘徊新造句,為作品帶嚟新意,但音樂依然集優雅、寧靜、優美於一身。

Cavatina (Deer Hunter)

電氣化Nico  8年來新作更「型」冷漠
Anika
Finger Pies ( Single)
大小姐於2010年由Portishead個Geoff Barrow帶出道,Skeeter Davis首經典情歌《The End Of The World》竟然畀佢唱出地下幽閉味道,佢嘅風格可以簡單形容係Synthwave x Nico。至今已經足足11年,佢無論冷漠唱腔、髮型身裁,同埋嬲咗成村人嗰副面口依然冇變,不過啱口味嘅會形容呢種叫做型格,甚至有種幾Cool嘅性感。好嘞,今次呢個MV,佢搵咗朋友仔Sven Gutjahr幫手做導演,據講拍攝時柏林因為疫情有好嚴嘅社交禁令,全程做賊一樣。

Finger Pies (Official MV):

喺以下呢條現場錄影片段入面,包括有四首歌,我最鍾意係重唱大野洋子寫於1973年嘅《Yang Yang》,雖然Anika木無表情零舞姿兼唱到寒晒背,型喎不過。當然,條窄身紅裙有佢嘅焦點所在。

A Short Live Film : No one is there / Yang Yang / I Go To Sleep / Masters Of War

嗱,欲罷不能,又睇番呢條10年前嘅片,唱嘅就係嗰首上面話佢唱出殯儀味道嘅《世界末日》,嗰種格調真係第度搵唔番:

The End Of The World (Live)

天外飛蓮以黑奴武士向北斗之拳致敬
Flying Lotus
Yakuke Original Soundtrack
唔講你可能唔知,呢位來自LA自稱「天外飛蓮」,以電音撈Hip Hop兼且不斷搞越界創作嘅黑鬼(絕冇歧視意思)係條百分百日本動漫迷,哈日程度絕對超越你同我。由細開始沉迷日本另類電影同卡通,今次參與Netflix黑武士主題卡通片《弥助》,唔單只搞音樂,更瞓身做埋執行監製同故事創作。喺電影原聲唱片封面,可以睇見佢親身上陣托住把武士刀影相扮片中主角,不過要戴黑超,個Mood正正就係卡通片入面嗰種江戶時代有幻術又有木製機械人嘅平行世界氛圍,幾得意㗎,唔信自己睇:

Official Trailer :

卡通片片頭主題曲由佢老拍檔「雷貓」主唱,相較以往白鬼創作過嘅西洋日式音樂,佢哋又撞出咗另一種味道出嚟。

Yasuke Opening Theme : Black Gold (Feat. Thundercat)

全張電影原聲唱片總共有26首歌曲,大家慢慢欣賞。

Official Soundtrack Album Streaming :

黐孖筋!堅寫卅年財經教人理財,掌聲反而唔及匿喺信和中心偷寫十年黃紙仔推介古怪音樂電影導人升仙。其實都明嘅,成世人個劇本唔到你話事,但配樂都叫做有得你揀嘛。

0 comments on “黃紙仔音樂畫符 – 陳行 #61【專欄】

留言