喂，「點」呀！套戲咁攪會嚇死人㗎真係！
(睇Zack Snyder部《不死喪軍》驚到縮咗 不過唔關劇情事)
Zack Snyder (Director)
Army Of The Death
呢鑊嘢正所謂要利申吓先，Netflix冇喺呢度賣廣告，亦一毫子都冇收平過我，兼且鄙人自從細時畀Romero 1978年套《生人勿近》嚇病過後，成世人未再驚過任何恐怖片。但就只係今次，睇Zack Snyder套死人巜Army Of The Dead》中咗佢計，嚇到標咗冷汗兼有幾分鐘成個人想死。誇張？冇囉！話說睇呢套嘢捱到中間時已經不斷郁身郁勢，腦入面一路諗緊啲揶揄佢嘅形容詞。點不知，當阿德國仔夾萬專家解緊鎖時，電視螢幕中間偏左突然間出現一個點⋯⋯我講緊嘅係一個白點，一個4K電視同電腦Mon用家都最驚見到嘅「亮點」，亦即係屎忽鬼口中嘅死點(Dead Pixel)！天呀！我部OLED啱啱完咗保用就搞到又要嘥錢換機？唔好咁啦！老實講，喺幾個唔同場口睇見畫面有死點時，個心一路憂住憂住壞機，真係有少少冇心機睇落去，好很驚㗎真係！大嗱嗱七億港紙「筆直」，冇貴星擺明有錢畀劇組認真去玩製作，點會咁㗎？雖然有科技友分析話阿大導堅持用Canon 50mm f/0.95舊鏡頭，導致器材軟硬件匹配Auto Processing Setting出問題。但咁大扻作品連呢啲低級錯誤都冇喺做後期時執好，Netflix又照出街，堅係講唔過去囉！咪怪我小心眼，今部戲玩到喪屍都有高低階級分，有份編劇嘅阿Zack又做導演兼做埋Cinematographer ，對用乜嘢鏡頭都咁執着。會唔會其實出現咗皇帝的新衣古仔呢又？畀着你喺現場打緊佢工，明係見到有鑊，你夠膽出聲話佢唔衰攞嚟衰嗎？仲有，段估唔會又鋪路搞導演版吓話？！
嗱嗱嗱，唔係淨係我詐型㗎！好多鬼頭都畀佢嚇到下邊標咗兩滴。第一條片呢個標題話阿Zack部Cam壞咗，但由頭到尾乜都講唔到，淨係識得影住個電視螢幕上嘅死點，睇怕其實喊緊：
呢兜叫自己做Tech Nick嘅友介紹套戲都講到一舊雲咁，邊個主角做過啲乜全部印象派唔清唔楚。佢睇戲發現Dead Pixel時，明明自己用緊Projector，都話畀粒嘢搞到冇咗心機，嚇到即時軟咗喎⋯⋯對腳。
呢個德國佬受驚嚇嘅程度更深，嚇到話有白點之外仲有黑點。佢成條片一路Zoom落個死點度睇吓入面係咪收埋彩蛋。佢講乜？嘩，聽落好爛口喎好似，唔方便喺度講啦吓話？
MUTE電音門主「械鬥」DM音響工程師
Sunroof (Daniel Miller & Garett Jones)
Electronic Music Improvisations Vol. 1
DM同Yazoo嘅伯樂兼英國電音Label MUTE揸Fit人，揾埋合作四十幾年嘅Engineer，講到明唔作曲冇預備，搭好啲Modular Synthesizers就當場執生互片玩即興，擺到明係兩條有錢阿伯高手過招，喺音頻入面打撈到啲乜嘢出嚟佢哋自己都唔知道。
嗱，今匀唔一次過畀晒大碟8首音樂你聽，反而搵咗三個官方MV畀過你嘆。聽住啲咁嘅電子音樂，睇埋啲咁嘅Visual，唔High有鬼？之不過，下面呢三首歌啲歌名，你唔好問我點解！
1.1-7.5.19
1.2-30.5.19
1.3-30.5.19
英倫型格象人的Psychedelic 藍音
Matt Berry
The Blue Elephant
本身係演員/配音員/作家兼且音樂人嘅Matt Berry ，先後已經喺Acid Jazz Label推出6張大碟，估佢唔到口碑一直唔錯。深受六七十年代迷幻搖滾我影響嘅佢，喺今次呢張唱片入面講到明係要玩懷舊迷幻聲音，一手包辦晒幾乎所有樂器演奏，一心要用老餅電柴Effect同電子琴聲，帶大家番去舊時嗰度，隊兩杯大啤緬懷一下舊式酒廊酒吧射燈嘅迷濛紅藍色調。以下首純音樂火辣辣震騰騰嘅電結他，伴住中段放出嘅老餅「太空味」Phrasing Effect 。真係N年冇聽過啲咁嘢，天口㷫啱聽呀喂！
Invisible ：
呢首歌顧名思義係以藍調為基礎，樂器演奏同唱法雖然簡單，但非常好Feel：
Blues Inside Me (feat. Rosie McDermott)
只係開頭吟咗兩句，四分幾鐘幾近純音樂演奏嘅大碟主題曲《The Blue Elephant》，嗰種琴聲充斥住一大磅七十年代尾歌廳酒廊嘅煙味：
重温Mary Hopkin 短暫星途「那些日子」
Mary Hopkin
Live at the Royal Festival Hall 1972 (2021 Remastered)
呢場1972年嘅音樂會算係記錄咗一段已經褪色嘅感情。Mary當時已經嫁咗畀唱片監製Tony Visconti，現場順理成章由Tony領導Pop Arts Strong Quarter伴奏，但Mary退出歌壇後佢哋嘅婚姻亦只維持咗十年。音樂會現場錄音唱片其實喺2005年曾經出版過一次，之後阿仔Morgan Visconti覺得音響效果可以再執靚啲，所以出手修復並重新出唱片。為咗介紹呢個最新版本，佢啲仔女除咗積極參與製作，亦都搞咗個網上頻道，每月一次向大家講解呢個媽媽最滿意而包括首首金曲嘅美好回憶。節目禮拜日至正式播出，約定你大家一齊睇：
唔知由幾時開始，下邊呢首歌對香港人而言隱約包含咗另外一啲感覺同意思，大家慢用：
Streets of London：
音樂會上面，佢現場演繹咗Cat Steven 所寫嘅《Morning Has Broken》，出谷黃鶯般嘅歌喉，聽出耳油㗎真係：
當然唔少得呢首喺1968年由披頭Paul監製嘅成名作《Those We’re The Days》：
