黃紙仔音樂畫符 - 陳行 #67【專欄】

歐式Improv結他大師 Keith Rowe 藉着電波及空氣聲跟自己道別

(唔使慌，佢未死，只不過⋯⋯）

「退下來是很艱難痛苦的，要接受現實，明白自己已經不重要了，即使你不再演奏，世界也不會理會，又可能根本不知道。然而，你氣泡以外的世界舊運行。習慣吧，你根本不是任何東西的核心」玩了超過半世紀音樂，一手開創歐式Improv即興爵士流派的結他手Keith Rowe，在他最新現場錄音唱片序言中如是說，看後怎不令人驟覺沉重？幾十年來的創作，不停被形容為「亂來」甚至「惡頂」，受盡主流冷眼歧視，他堅持以探索精神代替一己成就，啓發了後世電音和寧靜的運用。今次這張沿用解體結他、零碎廣播、電波電流聲和空氣氛圍泡製的唱片定名「缺席」，隱約多了觀眾拉櫈離場聲及一些唏噓。

Keith Rowe
Absence
阿大師最後一張現場錄音，我唔打算喺度揾畀大家免費欣賞。不過，喺以下呢條片入面，大家可以睇吓Keith Rowe表演點樣用佢嘅肢離疏結他同奇怪配件，彈奏出匪夷所思的氛圍：

Keith Rowe at Kongsberg Jazzfestival, Norway 2010 :

當年David Sylvian旗下檔Samadhi Sound喺推廣歐洲式Improv方面真心係不遺餘力，當時出嘅唯一一張DVD 《Amplified Gestures》裏頭，可以見到Keith講解當初點解會想搞啲咁吃力不討好嘅音樂：

Amplified Gestures:

Improv樂團AMM三子(已經變晒阿伯) 2016年喺Sonic Protest Festival 嘅公開表演，當其時Keith已經確診柏金遜症：

韮澤靖設計假鹹蛋超人老友真心實現

Arco

怪獣 Remix Series KRS x NIRASAWA/ Ultraman : 假鹹蛋超人軟膠製塗装完成品

講到日系畏怖手辦模型造型師，1990年代冒起而可以蜚聲國際嘅，除咗今時今日已貴為巨匠級數嘅竹谷隆之外，其實仲有佢識於微時嘅老友韮澤靖。韮澤作品由於有Rock味又懂得加入荷里活元素，角色造型吓吓皮褸金屬鏈，又KISS又Medusa又Marilyn Mansion，起步階段甚至比竹谷更早贏得鬼子佬受落，亦較竹谷更早推出個人作品集《Phantom Core》。只可惜，天妒英才，2016年因病去世，佢死前幾年曾來港出席玩具展。當日見他體型暴瘦，曾問原因，他笑說Keep Fit，想不到一別成永訣。今次的Fake Ultraman，就係基於韮澤繪畫嘅設計圖而進行立體化，由百武朋負責造型，並由老友竹谷主責監修。Soft Vinyl成型，32CM高上色完成品賣19580日圓，算合理吧。在當下這個扭曲的世界，一個隱藏邪惡的異變超人，確實是最適合不過。

日本豆魚雷網站有詳細資料，也接受預訂：

https://mamegyorai.jp/net/main/item_detail/item_detail.aspx?item=618745

老翻Bee Gees , Foo Fighters喪玩的士夠生

Dee Gees
Hail Satin

自己從來唔係西雅圖之音「尿彎哪」同Dave Grohl歌迷，之不過同阿Dave一樣細個時聽比知兄弟音樂入晒腦。今次佢扮鬼扮馬搞隊咁嘅Dee Gees樂隊嚟向1970年代「的士夠生」(DISCO Sound)致敬，雖只係得5首歌，但都好忠於原著，聽落可算係非常過癮。以下呢首嘢嘅前奏音樂一響起，就算瞌埋眼都會睇見天花板鏡片波轉出嚟嘅「的士夠格」閃燈效果。即管試吓忍住唔跟着唱吖，我就失敗咗嘞：

You Should be Dancing :

呢首《影子舞》雖然唔係Bee Gees主唱，但由佢哋寫畀初出道细佬Andy Gibbs，當然喺1970年代一樣紅到癲，紅到翡翠劇場入面都播足半首畀艾迪跟住跳舞㗎真係：

Shadow Dancing

名成利就新古典才子重遇出道時的自己

Dustin O’Halloran
Silfur

老人院時間：十幾年前仲有喺信和中心地庫開CD交易所時，我夠膽認係帶頭喺香港賣Neo Classical㗎。未簽DGG嘅Max Richter 同Johann Johannsson 、Hildur Gudnadottir 又甚至Goldmund。當然亦有花盡心力去推呢位來自美國，琴聲簡約浪漫嘅Dustin O’Halloran。當年除咗深夜嘥心機寫黃紙仔介紹之外，淨係教舊拍擋點樣讀呢個人名已經激Q死，但到家陣佢都仲讀緊「蝦佬喂」。講番今次呢張新唱片絕大部分作品係舊曲新演繹，家陣已成大師嘅Dustin話透過回顧音樂，可以了解番年輕時嘅自己。既然講到要新舊比較，我特登揀咗三首，同時奉上新舊版本由大家自己去細心聽細心比較吓：

Opus 21 (Silfur Version)