藝術 音樂 黃紙仔 專欄 文化

黃紙仔音樂畫符 – 陳行 #68【專欄】

孤獨但不寂寞  用百年壞鋼琴彈25首即興作樂

Richard Pellegrin
Solitude : Solo Improvisations

如果要吹Solitude 同Loneliness 嘅分別,睇怕可以呃到足足一期稿費,唔信可以睇黃紙仔個開頭,不過唔喇。講番今次介紹嘅美國學院派作曲家Richard Pellegrin,佢絕對係獨孤派傳人,堅信同外界隔絕有益身心,可令腦筋清醒刺激創意。同以往夾Band玩嘅幾人樂團唔同,今匀喺佢最鍾意自閉嘅西雅圖某小島老教堂入面,佢用一座有過百年歴史機件有些微故障嘅鋼琴,錄咗25首即興音樂,更合輯成呢張主題就叫《Solitude》嘅大碟。大家又咪搞錯噃,作品入面洋溢嘅並唔係無人無物感懷身世嘅寂寞哀愁,反而係盡顯無拘無束嘅奇想、逆向思維以至樂安天命嘅感恩。全張共25首,慢用:

Robert Fripp拍Dave Ball  古法秘製「鯨」謠

The Grid / Fripp
Leviathan 

1980S Syn Pop二人組Soft Cell個琴獸肥佬Dave Ball領軍嘅電聲單位The Grid,喺1993年因為幫當年Sylvian / Fripp首《Darshan》造Remix,搭上咗King Crimson 結他大神Robert Fripp。當時Robert彈低嘅Session Tape,之前突然出土仲搞搞吓竟然可以衍生出今次一整張大碟,兼仲相隔成卅年唔覺Out。你都咪話唔出奇!唱片內第一張Single《Fire Tower 》嘅MV :

大碟名《Leviathan 》其實係聖經入面講嘅一隻又似鯨魚又似鱷魚嘅海怪,耶L嘢唔到我講。以下共9首一Q過,計正可以當Ambient嘢聽:

話時話,你有幾耐冇見過羅拔先生同Toyah兩公婆呢又?如果好耐,睇吓以下依條片,保證你目定口呆至少5分鐘,跟住不停問「我睇咗啲乜嘢呀?」重唱Eurythmics 嘅《Sweet Dreams (Are Made Of This)》喎佢哋:

大衛連治繆思與巴黎翻唱大王玩轉The Cure

Strange As Angels
Marc Colin Presents : Chrystabell Sings The Cure

首先大家要搞清楚,樂隊名、唱片名同人名都可能搞到大家好亂。言則通常翻唱親The Cure作品例畀人小,之不過今次唱片入面阿囡唱腔嗰種特麗七彩闊銀幕電影感,加上Nouvelle Vague嗰條Marc Colin精心炮製嘅弦樂編排,配咗世上首種電子樂器Therminovox,夾夾埋埋嚟演繹Cure嘅Gothic Noir,都幾絕㗎我覺。嗱,以下係1990年代至畸型情歌《Friday I’m In Love 》嘅Strange As Angels重唱新版手作仔MV ,幾頂癮㗎!

幾個月前介紹過呢首佢哋最先翻唱嘅Cure作品《Charlotte Sometimes》,睇多次?又知唔知MV入面嗰陣令人不安嘅「徐」嚟自邊套戲?上年嘅美國獨立電影《Ham on rye》由Tyler Taormina導演,講一班小鎮年輕人喺一次食店舉行嘅簡單儀式上,要決定晒未來去留同成世點樣過,幾得意㗎睇嗰個⋯⋯不過據講美國鎭仔真有其事喎,唔乸係話?

得嘞得嘞,知啦,全張大碟共13首畀晒你聽:

沒消息的消息  坂本龍一新作「毒水」配樂

Ryuichi Sakamoto
Minamata Original Soundtrack

正在休養中完全冇晒聲氣嘅交收,知道你哋掛住佢,推出全新電影配樂希望可以撫慰你嘅飢渴心靈。今次嘅配樂搞成點?其實淨係首主題曲巜Minamata Piano Theme》已經交足功課,悲天憫人溫柔細膩。其實喺上年5月16日,Playing The Piano For The Isolated 音樂會上,現場彈奏過,我一聽Loop咗6次:

《毒水曝光》日本版電影Trailer :

以下條片可以睇到,由於日本仔將毒水就咁倒出海,結果搞到好大鑊,首先係雀仔同小動物因為食咗受感染嘅魚出事,貓仔毒發瘋狂抽搐痙攣,爭相跳海自殺。之後,到人類感染確診個案湧現,手足麻痺、痙攣、失智、神經錯亂以至死亡,孕婦當然亦將毒害傳到胎兒。你話幾Q慘吖當時⋯⋯係,當時1950年代嘛,講緊日本熊本縣水俁市工廠毒水慘劇喎。哦,咪誤會,我唔係講佢哋嚟緊會將核廢水倒入公海嗰件事,嗰單仲未,遲啲先,新呢鑊亦應該唔止佢哋有事啦吓話?咦,乜得好似唔關你事咁嘅喂!

0 comments on “黃紙仔音樂畫符 – 陳行 #68【專欄】

留言