藝術 音樂 黃紙仔 專欄 文化

黃紙仔音樂畫符 – 陳行 #69【專欄】

大叔的愛4味:留二撇雞、Jazz Bowie、WI-FI HI-FI , 仲有情色俄羅斯妹

唔知點解亦都唔想知點解,起初一見到洗版式嘅二撇雞鬚依起棚牙電視劇造型,喺聯想起周慕雲、馮英湘,又甚至Freddie Mercury同黑龍司令之前,即時諗起嘅係1950年代樂隊The Platters個主音歌手Tony Williams,冇錯,即係唱「呃呃 Only Youuuu」嗰個。不過,到搵番個原裝MV出嚟睇時發覺,原來當年佢反而係隊內唯一一個冇鬚嘅,另外三個男和音個個二撇雞⋯⋯

「夾Band永冇共富貴」魔咒始祖 The Platters

點都好啦,咁啱有Tony Williams老哥撇甩樂隊後單飛嘅精選到手,又即管借頭借路講吓呢隊本身唔算Rock,但又最先名列Rock and Roll Hall of Fame嘅殿堂樂隊。The Platters 1952年成軍時其實冇人要,第一個經理人最後要央求老友作曲人Buck Ram接手。首世紀驚世金曲《Only You (And You Alone)》錄完印好晒細碟,最後亦冇正式賣出街,到佢哋要靠搭單簽過新公司之後至真正推出,結果銷量創咗N咁Q多個紀錄。係,共患難堅係唔可以共富貴嘅!主音歌手因分贓不匀離隊、隊員發達聲色犬馬沉淪毒海陣容頻變,以至同經理人因隊名使用權互告引發連綿官司,呢啲後世搖滾樂壇夾Band例牌衰嘅嘢,應該亦係由呢度最初開始。講到呢度,我哋聽吓Tony Williams 離隊之後嘅個人版《Only You (And You Alone》先:

喺香港以至大陸嘅90後同千禧世代之所以會識得呢首1960年代紅極一時嘅老歌,好大程度唔關The Platters事,反而要多謝劉鎮偉、星爺同羅家英。呃呃⋯Only Youuu ,莫怪師傅吟沉,戴番個箍⋯⋯:

《Only You》爆紅之後嘅第二彈細碟歌《The Great Pretender》,其實真係急到要經理人Buck Ram喺廁所門口寫嘅,呢個依然係Tony Williams撚起佢把油喉,用心獨唱嘅版本:

The Great Pretender:

其實Tony都唱過《Mona Lisa 》同《Too Young》,要同Nat King Cole比,你又點睇呢又?

最後,點都要聽埋1955年紅到癲嘅The Platters原版《Only You (And You Alone)》啦。企中間唱主音喺個咪Tony哥囉:

意大利爵士喇叭神手挑戰「寶兒歌」

Paola Fresu
Heroes Expanded : A Tribute To David Bowie

意大利當代最強而且又肯很定(冇打錯)最勤力嘅喇叭手Paolo Fresu,非單止經常被拉埋Miles Davis同級比較,據說也有能耐隨手攞起小號就隨心所欲咁吹,而令人以為吹喇叭唔使學根本好似唞氣咁容易。佢喺啱啱60歲生日時再次挑戰自己,悉心揀選一個5人超級樂師團隊翻玩David Bowie經典造致敬 ,要喺呢位神人作品入面帶出新感覺。除推出唱片外,前前後後亦一直同相關樂手巡迴表演玩呢個致敬Set List。喺佢哋嘅精心編排下,大衛寶兒嘅1970年代Glam Rock「兒」歌變成咁,Life On Mars:

1980年代原本同Pat Metheny 合作嘅Fusion改成咁,This is not America:

1960年代「大衛教派」國歌玩成咁,Space Oddity:

1970年代甚至到家陣每陣大是大非死人冧樓老奉主題曲近代豪俠傳唱成咁,Heroes:

冇嘢睇吖嘛?早知你會咁講,不過Paola Fresu 個Bowie Tribute 騷未有正式視像發表嘛,觀眾現場錄嘅睇唔睇?當老翻睇又好,靜雞雞瞄兩眼又好,其實現場氣氛好好㗎。意大利上年未爆疫情咩?講呢啲!曲目?我冇你咁得閒喎:

Live Gigs of July 14,2020

PS : 敬愛嘅第四世界小號手Jon Hassell 剛剛逝世,以下係佢同Paola Fresu合作嘅《Sketches of the the Mediterranean 》,兩位天才,一次睇晒,粒幾鐘眨吓眼過:

一個色色的俄羅斯妹會點玩環境音樂?

Perila 
How Much Time It Is Between You And Me ?

生於俄羅斯聖彼得堡嘅Aleksandra Zakharenko幾年前搬咗去柏林定居,上年九月因為疫情被困於法國一個畀山包圍而完全冇互聯網嘅鄉村。佢喺嗰度錄成咗今次呢張處女大碟,佢話當時時間觀念完全扭曲,一切變得好慢好慢,包括自己身體接受聲音同周圍環境嘅反應,呢個就係大碟嘅創作概念。全張唱片入面,自己最鍾意呢首全長七分半鐘嘅《You Disappear You Find Yourself Again》:

全張大碟共11 Cut :

嗱,講完大碟入正題,唔好話我生安白造,阿妹喺柏林社區電台有搞一個叫做《WET》嘅專屬Podcast,,以Perila做藝名,講到明同觀眾聽眾探討音樂、聲學同埋性愛之間嘅關係,佢亦都接受大家上傳有關於性嘅音頻甚至一啲難聽過粗口嘅聲音,大家朝向性治療同埋抒發扭曲情緒方面共同研究。以下係《WET》喺SoundCloud頁面,各位可以基於聲頻名稱同埋自己想像力,決定聽邊一條,有咩後果千祈唔好搵我: 

其中一條佢整出嚟叫《Glove Which Touched The Moss》嘅聲帶,大家聽到啲乜睇怕且個個唔同,懇請各位唔好諗諗埋一邊,聽電子音樂啫吓話:

上面講嘅《WET》,除咗你心諗嗰個解釋之外,其實亦都Stands for :Weird Erotic Tension。至於有幾Erotic同Weird?都係抵唔住頸,要畀多一條Link過你哋慢慢探索,俄羅斯妹喺入面有嘢醒大家,細節唔講咁白:

https://www.calvertjournal.com/features/show/12054/wet-goosebumps-music-russia-z

宜家聯乘Sonos WI-FI畫架喇叭換唔到畫?

IKEA x Sonos
SYMFONISK Picture Frame Wi-Fi Speaker

宜家傢俬之前搭埋Sonos推出過幾款家居喇叭之後,七月中出嘅畫框影Wi-Fi喇叭,應該會令受土地問題困擾又甚至因老婆品味問題困擾嘅樂迷心郁郁。僅兩吋厚但有「足夠」低頻,掛牆又得,擺地挨住牆扮型又得,一條電源線搞掂,你都咪話唔盞!只可惜,呢個「畫框」唔可以換你鍾意嘅畫或者相片上去,暫時只得原裝黑白兩款圖畫選擇,之後亦應該只可以買原裝畫。咁就死啦!一心想放張Jean Cocteau或者HR Giger上去唔得,換張至愛Tom Waits經典大碟海報上去又唔得,點叫得做畫架或者畫框呀又?其實家陣印Tee都大把得自訂圖案啦,可能大公司擔心版權問題啩。希望官方之後有好啲嘅換畫轉機啦,否則唯有寄望淘寶有完美解決方案嘞!

SYMFONISK Picture frame with Wi-Fi speaker, black – IKEA

消費科技網站Techspeech有簡單點評規格、性能同優點缺點,算Fair嘅。至於聲音效果點樣?暫時仲未有實體做測試喎,未知香港會唔會同時推呢?

兩間公司其實之前開咗一個聯合推介會,由雙方嘅高層、工程師同設計師介紹呢個新產品,有冇心機慢慢聽晒佢就留返你自己決定嘞:

0 comments on “黃紙仔音樂畫符 – 陳行 #69【專欄】

留言