40年前用18蚊買咗Queen嘅英版精選 改變咗我一世
按照唱片發行資料推算，大概是1981年底至1982年初的某一天，印象中嘅陰天唔記得係真實天氣抑或來自內心天真嘅虛無，如常返到新蒲崗「和尚寺」中學伍華書院，繼續面對一個初中生沉悶的、當年叫作填鴨式教育的學校生活，但這一日有點不同，同學區佬(佢姓區)應承以18蚊平價(正價廿到尾，佢話)轉讓一張超正唱片給我。藉住呢張Queen 樂隊的《Greatest Hits》，他教懂我街上一般唱片舖出售的是新加坡印的「雞版」，而轉賣給我的是原庄英國版，英國Band梗要跟番「產地來源政策」啦，「你睇內面係紙套，唔係膠袋㗎，不過我跟個日本仔NAGAOKA靜電套畀你啦。」每一個中學生身邊總有幾個仆街同學導佢哋昇仙，有啲群埋晏晝走堂去對面麗宮戲院睇邊食煙邊睇二輪鹹戲，有啲教你賭馬。區佬之後仲點咗我去廟街精美唱片買《Eagles Live》孖碟，千叮萬囑「記得話要美國版呀，靚聲好多兼有海報」，買唱片例必搜尋外版變了習慣。不過，佢之後做咗兩樣嘢令我嬲咗，1)佢着住對西德版嘅Adidas Tom Okker Professional波鞋，踩花我對買咗88蚊嘅Puma Red Star 右邊猄皮鞋面；2)用手搣花咗我件新買嘅紅色Adidas風褸個白色Logo。區佬到今日都應該唔會知道，受佢影響嘅腌尖腥悶幫咗我咁多年來工作上近乎吹毛求疵嘅唔妥協(當然亦得罪好Q多人)。喺佢度學識點樣透過音樂搵番自己，亦懂得發掘同享受普遍人未必會留意到嘅各種生活細節，但令我最記得佢嘅，反而係Queen呢張大碟同兩件當時好大件事嘅小事。
皇后樂隊精選40年來破盡紀錄
Queen
Greatest Hits
介紹我聽Queen呢張全球銷量逾600萬張，相隔40年竟可重上英國大碟榜第一名破盡紀錄唱片嘅舊同學區佬個名有個誠字。憶起舊事，為表誠意，專登搵咗呢個1981年英國初版時原庄曲目版本畀佢同大家聽，總共17首歌，人生在世真係冇乜幾何介紹唱片時講呢句說話「張碟每一首歌都好聽」：
巴西電音鬼才炮製變態西岸愛情故事集
Amon Tobin Presents Stone Giants
West Coast Love Stories
本身唔識樂理，出身里約熱內盧嘅DJ / Producer/ 電音作曲家Amon Tobin，喺佢以往嘅唱片入面玩匀晒Breakbeat、Trip Hop、Electro Funk以至電影同TV Game配樂，兼仲次次顛覆到令行家O晒嘴。佢今次出到Acoustic結他、傳統樂器話玩用Mellow、Relax風格玩啲Dream Pop呀Chill-Out呀咁嘅愛情故事喎。你信嗎？有幾首，自己聽，最後嗰首個歌名我鍾意：
Fairweather :
Best Be Sure :
West Coast Love Stories :
The Girl With The Great Ideas (That I Steal) :
美國鄕謠環境音樂的荒漠變奏
Blank Gloss
Melt
來自加州嘅Patrick Hills同Morgan Fox過往玩Punk，又玩實驗嘢，啱啱轉公司兼轉埋風格，改玩美式環境音樂。唔講唔知，Ambient Americana又或者叫Post Country嘅典範，竟然包括電影《德州巴黎》嘅Ry Cooder配樂、Brian Eno同Daniel Lanois合作作品同Hammock啲碟。講番今次呢張《Melt》，佢哋話將好多種美國佬傳統樂器拆散溶化，整成濾鏡，用嚟帶大家去睇喺美國嘅廢置貨倉、殘破霓虹燈旁寂寞公路同埋沙漠的天空喎。吹到咁大？唔好拆散，成張一次過聽晒嘞：
芬蘭手風琴手用打鐵音式敲醒你靈魂
Perttula
Pajavasara
年紀唔老但係刮光頭留一大把鬍鬚嘅芬蘭音樂家Toni Perttula，十幾年前喺意大利贏咗手風琴演奏冠軍之後，到今個月至推出處男作。芬蘭語大碟名稱中譯《打造鐵鎚》。佢話成張唱片中心思想係打鐵工場，將好多唔同嘅想法同埋音樂風格，好似鑄鐵同打鐵嘅過程一樣逐樣糅合改變成全新形態，當然佢亦真係加入咗打鐵聲。按照音樂嘅名稱，希望帶出手風琴音樂新感受振奮人心。以下揀選咗幾段佢自己對各首音樂嘅簡介畀大家欣賞吓，個名有埋芬蘭語同英譯，咁有教育意義？我知。
Rauta (Iron)
「鐵革命性地發展成堅強可靠但又萬用的金屬。這音樂形容的情感正是當下的絕對能量！若果你心想今日要以無窮力量斷石分金的，這是你要聽的音樂」：
Pohjoistuuli (North Wind):
「淒冷、危險、遙遠。這首《北風》要說的是有些上述的神秘，也會令人想起挪威畫家Theodor Kittelsen筆下孤獨的魔怪」：
Takouma (Dents)
「萬物皆有凹位。你固然可以學習接受它存在，但若要修正凹陷，需要在另一面出力衝擊，否則它永遠對你構成困擾」：
Talivenselkä (Heights Of Winter)
「這首《隆冬》是在一月一個非常寒冷的雪夜誕生，當時看到的冬天似永不終止。結果締造了這首強而有力又具故事性的作品」：
Vaskinen (Cooper)
「不知怎樣解釋，我將這種來自古老的合金看成是祖先一樣，也是這唱片的根源。完成第一首作品後，就改了這個名」：
Magnetar :
「自以為是的人類永遠只會想為何、怎麼和何時？但其實並不是什麼東西都有答案的。磁星是在太空存在的中子星，這音樂說的就是遙不可及一些不可知的事物，它們的存在根本也不需我們去解釋」：
