40年的愛染污了 還有沒有意思？
Soft Cell Bryan Ferry 時光倒流70年 食老本邊個最冇Heart？
實在慶幸經歷過外國流行音樂最光輝的年代，金光燦爛輝華程度絕非當下DIY、Bedroom Pop同Busking一輩(真心冇眨意)所能想像。以今次講嘅英倫紳士靚聲王Bryan Ferry爵士(佢堅有CBE銜頭)為例，佢嗰陣大大話話摩咗七年時間創作嘅1985年大碟《Boys And Girls》，監製攞個List同佢傾揀邊一個星級結他手彈Session時，傾傾吓變成「點解唔要晒全部？」結果唱片最終有晒Mark Knopfler 、David Gilmour、Nile Rogers同Keith Scott等等等等玩伴奏。可惜時移世易，國際唱片行業經營結構瓦解，現今唯一仲可以提供穩陣盈利貢獻嘅，就只剩低將1980S(或更舊)舊唱片Reissue、Re-Reissue同埋Re-ReReissue。之不過咁，食老本又好，翻渣再煲都好，真係畀番啲咁多良心吖好嗎？幾老嘅老襯其實都有佢嘅底線㗎真係。
軟細胞賀40周年 展示何謂Tainted Love？
Soft Cell
Tainted Love 40th Anniversary 10” EP
嗱嗱嗱，叫得做所謂嘅收藏家，通常係唔會斤斤計較個價錢嘅，只不過擺明畀人當水魚撳，又絕對係另外一件事。一張10吋EP，入面三首歌有兩首係舊嘅，所謂新歌其實只係一個新Remix。你要賣23.5英鎊(折合港幣249元)，連埋郵寄香港索價41英鎊(折合港幣435元)。咁都算嘞，諗住瞌埋眼照畀錢當買初戀啦，不過即使家陣接受預訂，畀咗錢要明年7月至交貨！呢吓唔掂喎，條氣點會順呀？乜唔係話慶祝今年7月張碟40周年咩？以3 Cut歌計，每首收你舊半水兼明年今日交貨，堅係連雞碎利息都蝕埋。訂唔訂你哋自己睇嘞：
其實，早喺Soft Cell官網推呢張EP前三個月，已經有唱片公司打《Tainted Love》40周年主意，推出又CD又7吋又12吋版顏色膠，不過啲歌係古靈精怪Remix之外，用嘅係新嘅Band Logo，個封面又唔知想點咁。都係咪嘞，留番你啦：
㷫時㷫，睇番個足足40年前嘅《Tainted Love》 MV，角色造型同拍法老餅之外，阿𢱑文哥演譯神態Camp到不能，你想話佢唔係嗰味都唔得。不過呢條片當年喺香港電視冇見過，係事過境遷N年之後先至喺錄影帶定雷射影碟第一次睇到：
早兩年，杏仁先生(花名超多)自己喺演唱會重新演繹呢首老歌金曲，雖則身型髮型走樣，但唱功依然好得。重點係望吓台下識得跟住唱嗰班人係乜嘢形態，有你有我囉：
老本易食多人食仲有另一例證，《Tainted Love》手動上鍊音樂盒，盛惠16英鎊一個，但聽落Melody唔多似咁喎：
https://www.theofficialmusicboxcompany.com/products/tnted-love-the-music-box
《時光倒流七十年》配樂唱片出新版 多24首音樂
John Barry
Somewhere In Time (2021 Expanded Original Soundtrack)
我手頭仲有總共兩張1980年出嘅MCA版本 《Somewhere In Time》黑膠，全張大碟共9首音樂，原先買嘅香港版勁多背景雜音，聽抒情音樂簡直係精神虐待，最後足足等咗半年先買到靚聲日本版。不過唔講你或者唔知，即使所謂嘅原聲配樂唱片其實都唔係當年電影入面嘅音樂，只係電影配樂嘅Re-record版本：
到1998年，唱片公司又委托皇家蘇格蘭交響樂團錄咗呢個版本，換過封面總共有19 Cuts，畀你全張聽晒，又睇吓你聽唔聽得出有咩分別：
如果你未睇過呢部戲，又或者幾十年冇再睇過呢部戲，以下呢一幕可算景靚人靚音樂靚聲色藝全。當年珍茜摩爾嗰種靚，係你唔會諗鹹濕嘢嗰種，又抑或當年情竇初開嘅我太純情呢？佢早兩年帶埋啲孫返去電影拍攝場地嗰間密芝州嘅Grand Hotel，出席一年一度嘅《Somewhere In Time》粉絲聚會。係喎，有班電影忠粉年年有搞，你同妳想去吓，資料自己查啦！
作為老影迷、當年曾經去過銅鑼灣碧麗宮戲院睇呢部《時光倒流七十年》嘅你，以下有19樣有關於部戲而你唔知嘅嘢話過你知：
https://www.somewhereintime.tv/article_didyouknow.htm
Bryan Ferry頭6張個人大碟再版黑膠 執過晒啲聲
Bryan Ferry
The First 6 Albums Reissued as Vinyl
輪伯(輪船個輪呀)最先嗰6張個人大碟(唔逐張列名呃稿費啦)，會喺6月底全部重新以黑膠唱片形式發行。呢6張嘢可算橫跨由1973至1985年Bryan Ferry同樂隊Roxy Music離離合合但彼此最美好嘅年代。再版唱片冇夾硬加入其他Non Album Tracks或者Alternate Versions，不過佢就揾咗個被英國《Hi-Fi Choice》雜誌評為擁有全英最強Remaster功夫嘅音響工程師Frank Arkwright同佢合作，喺Abbey Road Studio用原裝母帶全方位為新版大碟調聲。曲目上冇搞Extra花臣，但唱片Artwork 反而會加料喎，Ferry出名有Taste，質素唔使慌。新版黑膠賣20英鎊一張，6張套裝折扣價110英鎊，當然未連郵費，不過我覺得合理囉。
鬼叫全宇宙間只有一個Bryan Ferry，賣廣告都冇計喇吓話，自己揀嘞喂！
唔識Bryan Ferry ？喺6張大碟幾十首歌入面揀一首Sell你聽？唔使諗啦，喺Bryan Ferry獨有嘅浪漫主義裡頭，呢首《Slave To Love》被譽為最冧情歌。盡善盡美嘅Slow Dance音樂固之然靚絕，歌詞情深款款亦係聽到人呆晒，承諾嘅嘢其實唔需要複雜或者咩嘢轟烈，「唔變」兩個字如果真係做到，已經夠晒。「Though Your World Is Changing , I Will Be The Same. 」⋯⋯
阿天使囡囡用5首金曲玩轉你個八十年代
Angel Olsen
Aisle EP
從來只知道Angel Olsen聽Cure、Siouxsie同4AD嘢大而且深受其影響，但佢呢張打正旗號Sell 1980S嘅5曲EP喺選曲方面實在令我輩老鬼陰陰笑。除Laura Branigan之外，搬Billy Idol同Men Without Hats出嚟真係估佢唔到。仲有Alphaville首《Forever Young》喎，呢首嘢廣東話版邊個唱記得嗎？估中當然冇獎，只會提醒你最唔想記得嘅年紀數字。聽吓Angel妹妹唱慢動作版《Gloria》啦，佢話印象入面有一次養父母喺屋企搞聖誕舞會，啲姨姨一聽呢首歌即刻貢晒起身跳老舞，但回憶中舞姿全部慢動作，所以佢嘅版本亦變成咁：
借頭借路，都逼你聽一聽Laura Branigan 版本嘅《Gloria》，當年覺得佢雖然大隻咗少少，比例上又係平咗少少，不過Overall 都索㗎真係，可惜吖，好後生已經唔喺度，問你化未？
