黃紙仔音樂畫符 - 陳行 #75【專欄】

歸根曰靜，是謂復命，Enjoy The Silence

(今次我哋「靜」講三張碟加一本⋯⋯書)

撞都冇咁正，幾張碟咁啱都圍繞呢個主題，今次我哋乜都唔講，淨講一個字 —— 靜。姑勿論係老子講「歸根曰靜，是謂復命」嗰種終極嘅靜好、係其中一張新碟提到迷離大導David Lynch教人深寧垂釣嗰種超然嘅靜又好，又抑或喺另一張唱片藍鯨帶我哋潛入深海領會嘅電幻恬靜都好，今個禮拜我哋即管全心全意Enjoy The Silence ！

Goldmund愛妻處女大碟竟係大衛連治垂釣配樂

Hollie Kenniff

The Quiet Drift

你未必識得Hollie又或者佢隊電音二人組Mint Julep，但都有機會係佢老公Keith Kenniff嘅樂迷。乜水？Keith即係美國Neo Classical 代表之一Goldmund嘅真名。老土啲講句，佢兩個志趣相投嘅程度絕對會令唔少創作人以至從來都要「獨樂樂」嘅你，明白乜嘢叫做「只羨鴛鴦不羡仙」。佢兩公婆對音樂、書本以至喜歡David Lynch電影嘅Taste接近之餘，更加每有新嘢可以互相交流。講番今次呢張巜寧靜的漂流》係Hollie自己首張個人大碟，方向大致上係玩Ambient，主題係顛沛流離時內心渴求嘅寧靜，仲講到明係David Lynch教人冥想深寧垂釣嗰一種靜。佢一個人負責晒結他、低音、合成器等幾乎所有樂器嘅彈奏，老公阿Keith幫忙喺兩首歌入面彈鋼琴。據報張碟推出之後， CD同埋黑膠全部掃清，家陣就算想買只可以買網上串流版本，呢度全張畀你聽：

藍鯨與電音老人越界合作譜出南太平洋遷徙之歌

Peter Zinovieff

South Pacific Migration Party

海洋學家Susannah Buchan喺智利海岸周圍錄低咗一啲藍鯨嘅叫聲，揾咗英國電子樂器發明家Peter Zinovief合作，整合為今次呢張唱片內全長30分鐘包括5個Movements 嘅組曲。樂曲結合咗海洋生物、人類、有機以至科技元素在內，喺混和電子音頻嘅暗黑海水氛圍中，鯨魚「歌聲」彷彿係另一個世界傳來的奇異訊號。

可能你唔識佢係邊個，但係Peter喺1960年代尾已經製作電子樂器，佢曾經教過披頭四鼓手Ringo Starr用機仲嫌佢死蠢之外，Pink Floyd張《Dark Side Of The Moon》有用佢啲機。只可惜，Peter整機同玩電聲60年來，今次係佢第一次掛正名出唱片，但出碟之前冇耐剛剛仙遊，享年八十有八，未加天地人。以下全碟約30分鐘一Cut過，慢用，鍾意就去買番張膠或者CD啦好心。

「噪音藝術」東京現場錄音潛藏倉底35年出土

Art Of Noise

Noise In The City : Live In Tokyo 1986

鍾意Art Of Noise嘅你，今次終於有機會隔住喇叭聽佢哋高峰時期現場演奏，呢張唱片絶對係唔買唔得。其中，《Moments Of Love》呢首慢板歌亦好大可能係你磅水嘅主因！1980S Syn Pop浪潮中算係佢最早彈得出淒迷含蓄溫柔旖旎，呢首嘢當年冧女無數，連麥當娜嫁Sean Penn婚禮都要播佢，就知有幾巴閉。最抵死嘅係，由於樂隊早期一路戴住面具，Cut歌當年殺上美國R&B榜後，到家陣普遍美國人都仲以為係黑人玩嘅。而樂隊早期成員Paul Morley 一向負責形象同文獻工作，佢作咗個歌名《Moments In Love》之後，全首歌就得個名呢三個係字，但佢認填詞人係佢喎。吹咗咁耐，當然有呢首歌嘅最新現場錄音畀你哋聽，認得嗎？

Moments In Love :

有片你睇咁落本？倉底錄音出碟都有製作特輯？食懵你！只不過都叫做畀你睇吓唱片工場點樣壓製呢張白膠唱片啫：

The Making Of Art Of Noise-Noise In The City (Live In Tokyo 1986) :

占渣木殊唔聲唔聲推首本報紙併貼手作仔圖集

Jim Jarmusch

Some Collages

實在係邪釘嘅，上禮拜至提過，人稱怪雞導演嘅老占多才多藝，除咗拍電影之外有玩吓音樂，點知話口未完佢仲出埋第一本書。本嘢全部係佢老哥親手用報紙，用剪剪貼貼玩Collage嘅手作仔拼貼砌成，用盡名人明星政客相片移花接木大兜亂去玩。箇中嘅意思講緊乜又或諷刺緊乜？希望你睇得明。而究竟呢本咁嘢究竟係Art又定係「呃」？家陣逐頁揭埋畀你睇，由你定奪好未？