緩緩穿過大角咀一棟唐樓的暗巷，始找到「展覽場地」。那是一所位於地面後舖的小型滑板用品專門店「PSYROOT（痴根）Store」。其同名組織連結着一群本地滑板愛好者（板仔），不時舉辦活動交流「板經」，這次展覽是其中一項得意之作：「有啲skater本身係做紋身或者自己畫吓嘢，今次活動主要係想俾佢哋玩吓、試吓發揮喺個滑板『轆』上面。」門後迎接的是與店面一樣chill、（因沒剃鬚而）不願上鏡的主腦們Bun和Henry。
奇就奇在無論看多少次，其形狀、大小、設計始終不讓人覺得眼前的是個滑板轆—— 因為眼前作品通通是陶瓷，而均出自廿多位板仔/藝術家手中。二人直言眼中的板仔從來靈活性極大，一直遊走滑板和藝術之間：「總之都係好living嘅嘢。所以今次好想令人見到skater嘅另外一面—— 唔係只得踩滑板，其實佢都可以做到好多藝術方面嘅嘢。」
淘氣玩陶器，看板仔們如何在陶轆上下打 Tricks。
轆不似轆？
Bun和Henry回想活動諗頭始於年初。以滑板轆為創作概念，全因透過PSYROOT所連結的均為喜歡踩板的板友：「想同滑板有連結。我哋想做到一種感覺，係一班本地skater去做啲嘢出嚟俾人睇。」PSYROOT經營的也是滑板用品店，取材自與滑板相關的元素不難理解；然而選擇以陶瓷為創作媒材，就多得板友兼陶藝家「史葛拉陶」（Scott Chan）提議，雙方一拍即合：「史葛拉陶原本係做花盆、器皿、一啲基本嘅陶器。咁佢想搞啲嘢，大家又想搞啲嘢，咪一齊玩吓囉，當係滑板界嘅課外活動咁。」四月至五月期間，史葛拉陶陸續製作好一堆仿滑板轆外形的陶器；他在藝術家埋手創作前先進行解說，讓舉手參與的廿多位創作人放心在「轆」上盡情發揮。全部陶轆均由史葛拉陶一手包辦，大小、硬度、形狀均由他控制。
比一般滑板轆尺寸為巨型，讓藝術家擁有極大發揮空間；展覽屢屢出現讓人感驚喜的作品。 
「放大尺寸旨在想方便大家畫，就算照原本滑板轆嘅尺寸畫出嚟，感覺又冇咁容易睇到。」Bun笑言也許展出的陶器在某些觀眾眼中，比較像煙灰缸多於滑板轆；然而「轆不似轆」背後，有其原因和限制：「我都覺得細嗰啲係再似一個轆嘅，但係確實有難度；要拉成呢個形狀、入面要偷空而成個陶器又唔可以太薄，其實好唔容易。」滑板轆本身有不同樣式和特性，如傳統的轆面較圓潤；有些板友則會選擇方形的轆面，用以進行不同花式、或配合不同場地搭配使用。細心觀察比較，會發現不同作品轆面形狀的確有別，這或許是身兼板友身分的史葛拉陶所擁的創作優勢。
製陶轆非兒嬉
作為參與創作的其中一份子，Bun在展內貢獻了「兩個半」陶轆創作，以藍白色混搭如青花瓷般的質感，建立強烈的個人風格。先有靈感來自經典滑板品牌「Zipzinger」的作品《ZIPPSINGERR》，除了品牌名稱內藏「P」和「R」為「PSYROOT」食字，其標誌性的格紋突顯了不同層次的藍彩：「個轆燒完第一次之後我先畫嘅，畫完之後要再燒多次；我發現原來呢兩個步驟嘅先後次序，會令顏色深淺有好大分別。」事前沒有製陶經驗的Bun曾嘗試「先畫後燒」，結果發現塗畫過的部分顏色竟「失咗蹤」；卻也同時讓他對製陶學問「長知識」。他緊接拿出一排來自另一經典滑板品牌「Spitfire」的真·滑板轆，介紹繼續大玩自家品牌食字的作品《SPPITFIRRE》：「同樣用滑板品牌做二次創作，唔想太偏離我哋嘅核心主題。」考慮到參考的品牌名字帶火元素，Bun靈機一觸為作品增設蠟燭部分，加強功能性。
至於剩下的「半個」則由他出謀獻策，交予插畫師女友負責執行繪畫的部分。他笑指擁兩次前作經驗，就能指導女友突顯陶器美感的畫法：「因為《FORTUNE WHEEL》呢個係主題作品，所以唔炒得㗎！今次概念就真係來自我哋『PSYROOT』，想做到真係psychedelic（迷幻）嘅感覺，所以設計上有啲散修修、唔完整嘅字。」得到已燒好的模型便先以鉛筆起稿，添補藍色後交由史葛拉陶進行第二次燒製，其後塗上光油就大功告成。Bun笑指雖然一天內能完成一份作品，然而事前構思功夫耗費極多時間：「例如圖案上嘅滑板要點樣擺、貓上面嗰幾對眼又要點樣呈現；要犧牲啲乜嘢、保留乜嘢，係要諗清楚。」
自由創作 彰顯街板精神
「其實本身佢哋已經被困左喺呢一個模型上面，可能已經有好多局限。」Henry直言沒有提供任何指引規範創作者們，每件作品都是讓他們自由地直抒胸臆的載具：「有啲創作者嘅表達唔係只靠作品，所以作品隔離會有文字補充，提供多一個渠道俾佢哋表達思考。」二人特別提及十分欣賞的，有來自創作人GRIV一份純白色的蠟燭裝置作品；結合分別代表自由與規範的腳跟和鳥籠，從作為板友被限制使用城市空間的權利、延伸至集體無力感，讓人印象深刻：「佢曾經講過唔想畫個轆，但又想stand out成件事，而進行陶轆本體額外嘅設計，的確比較少人會咁做。」
二人表示除了陶轆設計，參展的創作人如Friday更會回收本地滑板木，為作品設計座台，嘗試圍繞「滑板」為主題盡量延展其可能性：「可能創作人本身係一個純粹嘅板友，個腦入邊會有好多橋，因為佢平時都要諗好多tricks去玩，令佢哋袋住咗好多想法同創意。」
參展創作人的創作習慣，更讓二人發現「純skater」和「純artist」的分野，十分有趣。例如藝術家甫看到陶轆就能輕易產生如爉燭台、香座甚至黑洞等天馬行空的想象；但對板仔來說，「就係會直接從一個『轆』嘅角度去諗。所以同滑板本身唔係有太多接觸嘅創作者，方向就會好唔同。」Henry笑言根據日常觀察所見，板仔一般會不經意地先著重功能性：「會好自覺咁避開咗個轆直接同地面磨擦嗰部分、唔會畫嗰度，因為我哋用開一般嘅滑板轆，好少會設計喺呢個極容易畫花嘅位。」
「或者啲人成日睇片覺得，板仔好容易做到某啲動作。但同平時打籃球或者踢波有少少唔同，板仔嘅失敗容易好多、次數亦多好多……」練習站起來的機會自然相應大增：「所以板仔都好襟捱，呢個係佢哋嘅特質。」Henry說。 
從深潛到浮上水面？
是次展覽雖只囊括廿多位創作者的作品，其創意概念和展現方式的多元性卻已叫人感驚喜。問二人會否再招攬更多創作者搞大佢，Henry笑回：「會㗎！下次目標係要一百粒！」這次廿多份作品就幾乎用盡小店展示空間，下個目標，自然是更大的場地。如此雄心壯志，因為店內曾透過「PSYROOT」平台宣傳，舉辦過如世界滑板日之類面向公眾的活動；由他們一手一腳準備物資，一起「衝斜路」、「飛吓台」，籌備過程裏讓他們看見希望：「唔知其他人會唔會搞啦，但如果我哋都唔搞呢啲活動，玩滑板嘅人就唔知做咩好，最後就係去板場到Hea吓就算。」他們笑言籌備活動，起碼有機會「搲吓啲sponsor，準備禮物搞吓比賽」，刺激圈子：「歸根究底，就係想記錄一啲開心嘅時刻。可能10年後睇返，原來當初唔係淨係話『死踩爛踩』、或者又係DJ party之類；想多元化啲、或者有啲藝術元素嘅活動，好似今次咁。」
然而由小型機構主辦、尤其涉及街頭文化的活動有多受大眾、城市空間和制度歡迎，大概Bun和Henry都心中有數。更別談彷彿永續輪迴的疫情和群聚殺手「599G」：「而家搞活動係唔容易嘅，要低調但係又想多啲人嚟…… 好難平衡。」Bun頓了一下，思考兩秒續道：「但，都係咁樣搞㗎喇。即係你去開啲underground嘅地方，其實就係咁樣玩，有時就係要咁樣探吓探吓，先好玩嘅。」
「我喺外面大街大巷俾你搵到，就唔正啦。呢個就係探索嘅步驟囉，我哋就係希望有啲需要經歷過先得到嘅嘢發生。」在狹縫中奮力掙扎，是Bun和Henry眼中的「板仔精神」。
陶轆展2021
時間：即日至8月8日
地點：PSYROOT（香港九龍大角咀博文街20A地下後舖）
撰文、攝影：熊天賜