咿，ABBA爸你都冇解嘅！
先旨聲明，自己絕非1970年代瑞典流行樂隊ABBA任何程度嘅粉絲。對於佢哋嘅印象，除咗細個喺電視見到佢哋用代表作《Fernando》幫樂聲牌電器賣廣告之外，清楚記得自己喺八十年代逛唱片舖時，每見親佢哋個招牌會即刻快手揭過，所以到今時今日其實真係一張都未幫襯過。咁，唔鍾意佢哋乜呢？家陣睇番，明明佢哋啲音樂旋律優美流麗和諧，永遠洋溢住一份甜到漏嘅歡欣喜悅。咪就係囉，十幾歲就算唔叫維特都會煩惱，沉溺愁滋味嘛，你吓吓Money Money Money、Knowing Me Knowing You 吓 ，一唔係又Mama Mia又Dancing Queen喎，咁開心做乜？當然，人大咗之後唔小心聽Portishead重唱佢哋首《SOS》至知箇中亦有酸苦怨恨，只不過幾廿歲人又點仲聽得番轉頭去Waterloo呢？好嘞，啱啱嘅禮拜五Twitter洗版式公告，ABBA會喺11月5號推出40年來首張大碟《Voyage》，下年仲會喺倫敦開革命性音樂會，革命性到喺台上面會睇到佢四個嘢回春變番1979年廿幾歲時嘅皮膚質素同埋體態活力。講緊當然係用先進科技Scan晒樂隊成員樣貌表情體型動作，結合立體投射技術得出嘅虛擬效果。製作公司係佐治盧卡斯創立嘅ILM，音樂會導演係以前拍Massive Attack MV起家嘅紀錄片導演Braille Walsh。嗰4個改埋名叫ABBAtars 嘅立體虛擬人形(3D Avatars )，到時會同現場隊十人伴奏樂隊又唱又跳，同你唱《The Winner Takes It All》。不過又咁喎，如果今次ABBA咁樣開「真人」騷冇事冇幹市場受，又冇人貢去消委會投訴。你都咪話唔大件事？！可以預見麥當娜70歲生日可以變番卅歲咁款，同時喺全世界N咁多個場一齊唱Live，連開N咁多場仲兼可能大吉利事有米高積遜跳住Moonwalk合唱。最後，可唔可以問個好蠢嘅問題：其實乜嘢叫做現場音樂會呢喂？！講咗咁耐，兩首新歌好唔好聽？會唔會買佢哋新大碟？恨唔恨睇佢哋倫敦音樂會？咿，問埋人哋啲咁嘢，你都冇解嘅！
搞足40年！ ABBA公布新大碟兼開「真人騷」
ABBA
Voyages
ABBA突然發表兩首Single歌，兼且預告年尾出大碟《Voyage 》同埋開革命性音樂會，消息絕對係全球震撼，你都真係咪睇小老嘢市場之大。喺其中一首新歌《I Still Have Faith In You》呢個MV入面，大家除咗可以約略回顧樂隊以前嘅風光史之外，到尾段更可以預覽一吓下年倫敦音樂會台上嘅大概情況。腌尖嘅我當然總有挑剔地方，不過亦要慨嘆科技嘅進步，隊員肢體動作眉頭眼額堅係似番㗎！
以下由Benny 同Björn兩個男人自己講番今次出新碟兼開音樂會有乜原因同諗法，條片好精彩㗎，絕對唔止剩係得訪問：
咁大單嘢冇人講？呢度有條Official Trailer 畀過你睇：
最後，聽埋另一首佢哋嘅新歌，《Don’t Shut Me Down》，個MV只係得歌詞，慢用：
不再愛美麗的Yann Tiersen 醉心家鄉小島風光
Yann Tiersen
Kerber
承接過去10年來Yann幾張大碟圍繞法國布列塔利區小島Ushant嘅遠近大小點滴，最新嘅《Kerber》更加係Zoom近埋去島上教堂周圍嘅風貌感覺。今次佢全張唱片歌曲用鋼琴創作彈奏，再經拍檔監製Gareth Jones解構，混入Samples同電聲，得出嘅Electroacoustic 觸感，令本來已經優美嘅調子有過去、現在、將來同時並現嘅層次。好嘢！唔信自己欣賞吓：
Ker Yegu (Official Video)
Ker al Loch (Official Video)
Poull Bojer (Official Video)
Introducing Yann Tiersen – Kerber
法國騷靈怨曲妖后深厚唱腔為金曲重灌生命
Imany
Voodoo Cello :
現年42歲喺法國大紅嘅女伶Imany，祖籍非洲葛摩，未分清佢算係Blues、Soul定Folk之前，一開金口已經令巴黎一眾樂評人慌忙將佢歸入Nina Simone同Tracy Chapman嗰派，你估到佢把聲唱到有幾沉啦。兩張唱片大賣之後，最新一張標題已經玩嘢，講到明用巫毒教法術控制大提琴樂團玩伴奏，用弦樂陪佢唱啲由細聽到大你同我都識唱嘅流行金曲。佢話翻唱技巧在乎於唔遷就歌曲，反而由歌曲遷就番佢喎！以下兩首分別係麥當娜同埋已故歌手Black嘅經典代表作，Imany現場唱，大碟本身亦有收錄，唔同版本自己揾吓啦：
Like a Prayer , Wonderful Life ( Fête de la musique 2021)
法國歌神Jacques Brel首《Ne Me Quitte Pas》N年前嘅英譯版《Please Don’t Go Away 》，以往唱得最好如泣如訴嘅係Marc Almond，之不過Imany呢個版又係另一樣嘢。
If You Go Away :
韮沢靖成名作首辦模型《蛹人》限量復刻
Yasushi Nirasawa
「R.I.S」Man Chrysalis
啱啱過咗嘅8月26日係日本首辦(有時叫手辦)模型大師兼動漫設計師韮沢靖嘅冥壽，佢2016年逝世時才不過52歲。可能有咁啱得咁橋，佢其中一隻最早期嘅首辦《Man Chrysalis 》喺日本再版發行。1992年由Begul廠初版時訂價9800日圓，但今次由Zo Models復刻版本索價27500日圓。《蛹人》主體新版都係Resin Cast，仲講明中間會留空令件件唔使咁重，某啲位倒模出嚟可能會有啲薄，廠方話韮沢氏當年初版時亦係咁樣「偷膠」慳料，呢樣嘢都係刻意致敬。而由於隻嘢有6隻腳仔同地台要自己砌，新版會經由兩位製作協力做少力Update，等佢易砌啲。仲有，據報隻《蛹人》限量發行，嚴禁倒賣，未必運出日本境外，幾日之間亦都已經全部賣晒，不過又不排除之後會再版，有興趣嘅吼實嘞！
之前都講過，我同韮沢San有過一面之緣傾過吓計。當時估唔到阿大師咁短命。不過，趁機會同大家回顧吓佢嘅作品。有粉絲造咗個簡單專頁㗎。當然，有Show到初回版嘅《Man Chrysalis 》。The Art Of Yasushi Nirasawa (韮沢靖)
