即係叫做讀過嗰幾個錢死人書，就好巴閉咁話喇係嘛？！
(今集有Akira Rabelais帶大家追憶逝水年華, 探埋海邊的卡夫卡, 有雌雄同體一出4張大碟嘅Arca, 仲有古董Synth佬Parralox翻玩人類聯盟全張Travelogue)
跟普魯斯特呼吸相同空氣 追憶逝水年華
Akira Rabelais
À la recherche du temps perdu
早在2004年首次聽到佢喺David Sylvian所創廠牌發表的大碟《Spellewauerynsherde》時，已經驚嘆Akira Rabelais這位來自美國德薩斯州的音樂奇才，竟然可以用自製電腦軟件重新處理意外拾到的冰島祭祀儀式輓歌卡式帶，譜寫出如此漂亮優美的旋律。一心在他的官方網站尋找創作蛛絲馬跡，見到網站招牌用日文寫住「用被遺忘的詩集紙割傷你的手指」，怯一怯，最終陷入一大堆易經卦象及古怪電腦圖形之中，從此成了他玄虛故弄的忠粉。Akira新近公布兩件新作，其一是基於法國意識流作家普魯斯特巨著《追憶逝水年華》衍生的同名大碟。他自稱斷續用了近十年創作，共用上51首十九世紀末至二十世紀初「美好時光」期間的古典樂曲，經由他自創的Argeïphontes Lyre影音兼容Filter軟件，融會成12首平均長約20分鐘的「音樂」。這些作品雖然保留了原曲的神髓，但加入了大量夾雜失真、轉速變調、飄移扭曲和某些令人困惑的音效。Akira說提煉了當下文化結構相關的元素混和其中，希望透過背景聲甚至個別建築物的回聲，讓我們經由改編了的古早作品導引回到普魯斯特創作時的氛圍，一起感受時間迷霧中不知名的幽靈。全套大碟共4張CD全長4個小時，限產500套，買得到亦未必聽得明頂得順。
喺以下嘅Bandcamp專頁入面，大家不妨又聽吓呢首足足有20分鐘零9秒長嘅呢首作品，歌名當然亦出自書中嘅《在斯萬家那邊》：
Du côté de chez Swann – Il y a bien des années ... dans le silence du soir
連歌名都直接引用書中語句固然神經病，更神經病嘅係大家睇睇影片下面嘅留言，有人查詢佢用乜嘢軟件創作呢啲音樂，Akira認真回覆嘅解釋，某程度上已經超越人類認知範圍，又抑或係我嘅問題？話時話，佢個軟件免費任你下載，不過咪搞我。
Or, à ce moment, je fus précisément favorisé d’une telle apparition magique：
全張《À la recherche du temps perdu 》12首喺晒度。你聽完有乜嘢頭暈身㷫認知障礙，通殺熊證中六合彩，全部唔關我事，免責㗎吓我！
在異色図書館拾到四頁海邊的卡夫卡
Akira Rabelais
図書館
正當耐性超乎常人嘅你睇完上面一大堆廢話，以為捱完之際。我哋之後繼續講嘅係Akira Rabelais另外一張新作《図書館》，係喎，冇英文，仲不單止日文大碟名，入面所有樂曲全部亦都係用日文名。吹咩？
本身係百分百鬼仔嘅Akira話，呢張唱片背景係圍繞村上春樹作品《海邊的卡夫卡》其中一幕創作。入面講到少年喺睡房中見到鬼，見係美少女外觀非但唔驚，仲畀佢外貌同神秘感迷住。到天光，瞓醒發現枕頭涼浸浸滿是涙印，但點解喊就唔知⋯⋯。唱片總共得四首，每首又係大約20分鐘長。與其講係音樂，不如形容係4段氣氛更加適合，總之朦朦朧朧中你覺得好似有啲喺邊度聽過咁，但其實冇，可能係集體潛意識作祟。你試吓聽以下呢首先，歌名大概係《我唔知鬼呢個字啱唔啱，但佢絕對唔屬於呢個世界。》喂，不如你望吓後面先！
幽霊が正しい言葉かどうかはわかりませんが、それは間違いなくこの世界のものではありません：
https://akirarabelais.bandcamp.com/track/-
雌雄同體Arca 四碟齊發 坂本龍一客串講古
Arca
kiCk ii, iii, iiii, iiiii
現年不過卅二歲嘅Arca，由於老竇係委內瑞拉著名iBanker ，自細有家庭教師同鋼琴老師，年紀輕輕出道紅到衝出委內瑞拉，之後亦因為本身冇有識死嘅古怪天份而被FKA twigs、Björk同Kanye班友捧到上天。上一年宣布推出大碟《kiCk i》嘅同時，亦都公布性別上由他變成她或者它。點都估唔到，張i之後佢會承接住推出ii、iii、iiii，最後仲喺冇預告之下整多一張iiiii。幾張唱片嘅內容自己睇黃紙仔，但喺以下個MV，你唔好問我點解打出對乳房出嚟唔使打格而YouTube又唔理。即咁，男人露上身點解要打格呢又？嗱，唔好問我佢究竟男定女、真定假、攣定直又或者係定唔係？MV入面只有佢一套世界觀同美學觀，喜唔喜歡隨得你。
Prada/Rakata :
久休未復出嘅坂本龍一，絕對可能比你同我加埋更加勤力。除咗不停有新唱片推出之外，亦都喺呢張唱片入面獻聲扮講古佬，講一個元宇宙某國度入面嘅故事。你聽佢用足心機嘅咬字同發音，可能個病好番啲啦喎。
Sanctuary (feat. Ryuichi Sakamoto) :
呢首有Sia客串，唔係佢粉，冇嘢好講，自己睇：
Born Yesterday (feat. Sia)
個人覺得kiCk第五集最有趣，全張獻給你。你聽完有乜性格大變或者性別大變，一樣唔關我事，都係免晒責嘅。
kiCk iiiii (Whole Album) :
人類聯盟張Dare個監製翻玩全張Travelogue ？
Parralox
Travelogue
講古時間！1980年呢張《Travelogue 》大碟，對於The Human League 嚟計絕對係一個重要里程碑。話說當年自認最有料嗰兩個成員覺得樂隊冇前途，決定另組精銳部隊Heaven 17。剩落嚟嘅Phil Oakey 面對冇人冇物樂隊瀕臨破產，喺酒吧溝咗兩件乜都唔識嘅學生妹，又即管叫佢哋嚟試吓唱和音跳吓舞。點知，喺呢個最弱雞嘅陳容下錄成震撼整過1980年代樂壇嘅Syn Pop經典大碟《Dare》。時至今日，來自澳洲嘅電子音樂發燒友John Von Ahlen ，以Parralox名義將全張《Travelogue 》由頭到腳玩過，即使係同期嘅EP同Single全部都玩晒。最吸引嘅係，大哥用番當年所有最堅嘅Analogue Synthesizer 名器彈奏，咩嘢Fairlight 、Jupiter 8、Matrix Brute 等等出齊。據佢話，你就當係喺某個平行時空入面，張《Dare》嘅監製Martin Rushent又或者Giorgio Moroder泡製《Travelogue 》喎。既然講到咁，我又即管同大家玩吓新舊比較。
Being Boiled – Parralox：
Being Boiled – The Human League (Granada TV 1978) :
The Black Hit Of Space – Parralox ：
The Black Hit Of Space – The Human League (1980 Video) :
整多兩首Parralox嘅新版過你嘆！
Toyota City :
Only After Dark :
