你咁搞確係冇乜謂，擺明同我過唔去啫？
（今次夠無謂! 有Brian Eno出嘅迷幻唱盤, Philippe Starck件限量版經典廢物Juicy Salif, 講埋Nils Frahm Piano Solo大碟23首「孤兒仔」, 仲有Nick Cave拍Warren Ellis第16張配樂）
環境音樂大師推出廿幾萬迷幻光影黑膠唱盤
Brian Eno
Turntable with Paul Stolpe Gallery
如果你本身最新環境音樂，又沉迷收集黑膠唱片，你大鑊嘞！不過最終又可能唔係好大鑊喎。話說Ambient 宗師Brian Eno長久以來一直想做晒Sound and Vision藝術家，花過好多心機搞Visual Art。繼之前同倫敦嘅Paul Stolper Gallery 合推光影變幻才是永恆的透鏡印刷畫後，最新作品是一個未聽聲已經超迷幻嘅黑膠唱盤，內置的一系列交織嘅LED，會不停地展示變幻無定萬花筒般的Colourscapes。估計Eno以至畫廊本身都不可能痴線到重本搞間唱機製造廠去整，所以自然尋求專業廠家協作。邊間？睇落唱臂似奧地利Pro-Ject產品，唱頭係Ortofon 2M Red，Belt Drive驅動又唔似㗎仔嘢，厚度18MM嘅底座同轉盤以Acrylic成型可以透光，令我諗起McIntosh 部MT10唱盤。嗰架機由德國佬Clearaudio設計及生產，唔知呢部又會唔會係⋯⋯。講咗咁耐，你好痕想買？今次畀我害死？未必喎。畫廊方面今次只係推出50部，每部有大師親筆簽名，幾多錢？你睇其他行家全部都唔知，因為官方要有誠意買家親自打電話去問至報價。答案係20,000英鎊，即係大約廿幾萬港紙。我點知？Errr⋯⋯，之不過你唔使典藏典蓆去諗嘞，因為公布幾日已經全部賣晒。冇得買啫，都有得你恨嚇吓嘅：
Brian Eno, Turntable, 2021 | Paul Stolper
大師之前同畫廊之間有其他合作仲有得賣。仲有仲有，呢間嘢都有好多同搖滾音樂有關嘅藝術品賣，我當然要播毒害吓你哋啦：
Brian Eno – Works | Paul Stolper
暫時未見到有任何片睇到呢部唱盤點操作，之不過同美術館合作之前有個展覽。展示咗包括Eno在內藝術家嘅唔少作品。不過呢條業餘觀眾拍嘅片，拍到鬼五馬六兼有細路仔叫囂，大煞風景，但有完美展示現場實況。
Philippe Starck檸檬榨汁器試作體登場掃晒
Philippe Starck
Juicy Salif Study n.3
講開敗家收藏品同設計師Gadgets停唔到口，索性執多一劑。上世紀90年代曾經威盡全世界嘅產品設計師Philippe Starck，應該唔會陌生。我自己當年可算迷到千金散盡，搞到一屋都係兼夾要租貨倉擺。一切源於損友送嘅一件檸檬榨汁機《Juicy Salif 》。呢件嘢所有人用過都必定鬧爆，難用之外有異整親手，所以有嘅人多數冇用，可謂廢物中嘅廢物，偏偏銷量冠絕全球，推出31年老襯不絕，生產商Alessi決定再版做紀念。今次呢個紀念品同街上所見不同，係Starck起初設計時失敗嘅試作Prototype ，之前未公開過，今次用青銅鑄製，限量生產999件，每件有大師簽名認證，索價一千歐元一件。買唔買好？Sorry ，已經咋一聲搶晒！你話吖，通脹破紀錄？聯儲局收水？兩年加息至少6次？Who Fukin Cares ? 嗱嗱嗱，大家睇吓近年自稱Ph.S.嘅阿Starck點樣親手畫番呢個幾十年前嘅設計。當然佢又吹一大串創作概念同唔知想點嘅嘢。不過無論點都好，一萬銀一個，999個高速賣晒。埋單計數一千萬港幣，Alessi 真係多得佢唔少，服未？
然後條片由用家親身體驗點樣用呢個殿堂級榨汁器，結果當然鬧爆，本身難用兼容易整親手、榨唔到汁又難清潔，乜嘢設計凌駕於實用，大師口不對心全部講齊，逐樣踩到一毫子都唔值。點解我咁勞氣？我屋企應該有4個。
德系新古典才子雙張大碟收容23個傑出「孤兒」
Nils Frahm
Old Friends New Friends
另一個某程度上都係廢物利用嘅故事。德國新古典代表Nils Frahm公布最新嘅雙張大碟《Old Friends New Friends》，個仔陰陰笑話呢張墊可以講係用足12年時間先至夠了造成。真實個古仔係點呢？其實去由2009年至2021年以來創作咁多張大碟，總有一啲作品創作好兼錄好，但由於種種原因完成晒之後冇用到，Keep咗喺Harddisk。先前疫情令佢的起心肝整理硬碟，當中聽番好多自己都唔記得咗嘅音樂，決定做一張大碟好似孤兒院咁收容呢班「孤兒仔」。其實啲音樂質素點樣？我可以講你聽，天才橫溢嘅Nils，即使Hea住玩都有咁上下水準，何況係真心認真去做呢又？以下呢似Erik Satie風，玩Pedals拖到你差啲唔記得咗個微弱嘅主旋律，不過實在好聽喎。
Weddinger Walzer:
睇過個名顧名思義，再聽吓音樂入面好似漣漪擴散閃閃發光嘅音符，同窗邊雨水拚命地侵擾安睡互相融合，已經靚到不能啦吓話？
Rain Take :
雖然講笑話佢廢物利用，不過全張大碟23首鋼琴獨奏當中，完全冇一啲半完成品或者Outtakes ，音樂着數絕對對得你哋住。唔信？全張你逐手檢查一下啦！
《Ild Friends New Friends 》Whole Album :
Nick Cave與Warren Ellis合作過最美的配樂
Nick Cave & Warren Ellis
La Panthère Des Neiges Original Soundtrack
睇到最後講嘅呢張電影原聲唱片，絕對同廢物或者個廢字冇關連。Nick Cave and the Bad Seeds入面，較後期加入嘅Warren Ellis可算係天才橫溢，單喺今次張唱片入面已經玩咗十幾種唔同樂器，難怪阿蝠王Nick Cave近年一隻拍着佢玩。實際上，呢張亦都係佢兩個第16張合作嘅Soundtrack。講番電影本身其實係自然生態攝影師Vincent Munier同小說作家Sylvain Tesson一次尋找雪豹天極之旅嘅紀錄片。唱片23首我覺得好聽到爆嘅配樂，陪住兩個主角一路靜待傳說中極稀有生物嘅出現，亦配合天蒼蒼路茫茫嘅環境下襯托出兩人不停變化嘅心情。Warren原本搵阿Nick幫手唱主題曲，諗住一日搞掂，結果Nick Cave睇完片搞足四日唔肯走，造成今次呢張佢哋都認為係歷來最美麗配樂嘅傑作。以下係其中兩首由Nick Cave主唱嘅主題曲同插曲。
We Are Not Alone：
Les Cerfs ：
有人話，人老咗會愈嚟愈喜歡睇動物片多過睇戲要見到人。睇完呢條片頭之後，我開始擔心，有少少啫⋯⋯
La Panthère Des Neiges Movie Trailer
