你睇衰得佢吖，仲係咁望住人放生電！
（今集堅係電到痹, 有恐龍級類比合成器作品回魂, 兼有人翻玩全張Air嘅Moon Safari, 有Boy Harsher最新電影配樂, 仲有兩張失蹤廿幾卅年Art Of Noise唱片出土）
百分百重現類比合成器三部曲的苦心
Colette Broeckaert, Martin Lorenz and Sebastian Berweck
Bernard Parmegiani – Stries
提起上世紀七十年代嘅古祖類比電子合成器(Analogue Synthesizer)，聽嘅人可能過癮樂此不疲，不過負責彈嘅肯定提起都頭痛，兼且冇乜邊個會喺舞台上現場演奏。因為當時未有數碼記錄功能，每一件模組喺個別調教情況下出現「過」嘅聲音轉瞬即逝，即使同一機款同樣設定，只要現場室溫輕微改變又或者隔離屋有人開關電燈掣，聲頻隨時又會完全唔同晒聲。偏偏，歐洲就有少部分嘅死硬派擁躉耗盡半生心力努力創作，甚至希望能人所不能在舞台上重現前輩苦心經營嘅每一粒音符。例如今次介紹嘅呢張唱片，絕對係揼石仔嘔心瀝血作品。柏林三人組Colette Broeckaert、Martin Lorenz 同Sebastian Berweck有見前輩同道人作曲家Bernard Parmegiani 喺1980年寫嘅三部曲作品《Stries》，一直只可以遺留喺舊唱片入面，佢哋決定要完整原汁原味重新演奏灌錄新唱片，箇中所涉心力絕對不足為外人道，詳情自己睇黃紙仔啦。以下係其中最後一部曲。建議大家留意聲音起跌之間，介乎0與1殘存嘅空白位，嗰樣先至係靈魂。
Stries : III. Stries ：
前任軟件工程師翻玩全張Air嘅《Moon Safari》
Dave Depper
Moon Safari
樂隊Death Cab For Cutie個鍵琴手/結他手Dave Depper喺美國俄立岡大學主修電腦及資訊科技，做咗幾年軟件工程師先至轉去夾Band，邏輯上肯定唔係傻仔，不過佢喺樂隊以外迷醉嘅嗜好，未必個個人認同。繼十年前花咗30日重玩披頭四保羅麥卡尼嘅全張《Ram》大碟之後，佢啱啱又全張重新灌錄Air張電音經典《Moon Safari》，仲事先講到明個挑戰非常艱巨，亦冇可能超越原作，不過勝在過程玩得開心。當中，佢將原裝嗰份1960年代薄紗朦朧變成80年代嘅古銅色陽光，原版嘅Lounge Drum Loop換成Roland 707鼓機聲，兼放棄咗舊有嘅招牌Vocoder聲效。聽呢一張唱片，某程度上有種非熟悉化感覺，真心似係擘大眼發夢喎。唔信？整首《Sexy Boy》你歎吓：
好夢由來最易醒，想個夢長一啲？全張唱片喇好冇！
麻省電幻二人組為首部執導影畫戲配樂
The Runner
Boy Harsher
由Jae Matthews同Augustus Muller兩個電影學院同學合組嘅美國電子音樂二人組Boy Harsher，八九年前憑藉一首《Pain》喺地下音樂圈擁有一定信眾。除咗鍾意聽Synth Pop同Dark Wave之外，佢哋兩個喜歡嘅獨立電影口味亦相近，眼見當下疫情下冇得Tour，不如趁機會圓夢低成本執拍首部短短哋電影《The Runner》，話套電影風格其實等於將係佢哋錄唱片嘅平行世界迷幻驚慄心路歷程影像化，自創嘅配樂當然順理成章變成佢哋新唱片。作為文清嘅你，眼見人哋一步步完成心中音樂同電影兩大夢想，因乜仲坐喺度Hea呀？冇運？運氣只會幫助努力嘅人，我話嘅！講番套電影，瀰漫住佢哋偶像大衛連治又有啲大衛哥連堡嗰亭風格，我等老鬼當然唔會寄予厚望，但不妨又觀摩吓佢哋兩條片頭吖：
The Runner I Official Trailer HD I Boy Harsher
The Runner I Official Trailer #2 HD I Boy Harsher
低成本自拍電影嘅衍生品，新作歌曲MV：
Machina (Ft. Ms. BOAN – Mariana Saldaña) (Official Video)
「噪音藝術」廿幾年前舊作出土 預示元宇宙？
Art Of Noise
Born Again EP / Balance
之前講過1980年代英國廠牌ZTT同佢哋捧紅Frankie Goes To Hollywood 嘅傳奇，更加離奇嘅係佢哋旗下另一隊電聲組合Art Of Noise，曾經重金灌錄一整張大碟《Balance》而最後可以因種種原因放棄唔出！之後曾經試過再整張5首歌嘅EP《Born Again》部署重出江湖，最後亦都放棄埋。相隔廿幾年之後，呢兩件出土文物重新混音推出，聽返佢哋嘅音樂同睇返佢哋當年創作嘅文本，發覺非但唔落伍，兼且比現代更加現代，涉及眾多Meta字首字眼確實匪夷所思！我哋聽咗張EP先：
呢張創作時預告有5種聽法嘅《Balance》一早錄好晒，原訂1996年底出，結果胎死腹中，隔咗兩年半之後Art Of Noise先至推出經典專集《The Seduction Of Debussy》。家陣聽返兩者之間嘅進化異同，亦係好大樂趣。最抵死嘅係，啲音樂完全冇Out到。話時話，Art Of Noise成員Anne Dudley 幫變態修女戲《Benedetta 》造嘅配樂有冇聽？好喎我覺！
Balance (Music For The Eye)：
