黃紙仔音樂畫符 – 陳行 #101【專欄】

開講有話：一個酸梅兩個核，今時都點同往日吖？
(今集聽《Drive My Car》配樂爆紅前嘅石橋英子, 有Ludovico Einaudi廿年來第一張新寫Solo Piano, 聽Ambient大師Biosphere 《短波回憶》,兼仲重温鬼聲鬼氣嘅Nico邪釘舊唱片)

在《Drive My Car》配樂之前的石橋英子
Eiko Ishibashi
For McCoy

一齣《Drive My Car》離奇地令契可夫三個字，甚至Samuel Beckett 套《等待果陀》突然變成深水埗街頭聽得到嘅詞彙，同時亦令做過冷門音樂雜誌《WIRE》嘅Eiko Isibashi (石橋英子)變成考信和中心唱片舖牌嘅關鍵字。《Drive My Car》原聲配樂限量版黑膠及卡式單變成炒作潮物之際，我又不妨趁高興射吓水幫大家降降温。講緊嘅呢張《For McCoy》唱片，只有三首音樂，招牌式水蛇春咁長歌名兼分兩Part嘅作品《I Can Feel Guilty About Anything》，每Part已經十幾分鐘長。大碟創作概念來自石橋小姐從來最迷嘅美劇《Law & Order》，話十幾廿年來不斷地睇，入面主角Jack McCoy把聲成日喺屋企出現，但劇情從來冇講過角色私生活，所以佢一心想用音樂向呢位仁兄致敬。可能自知Free Form Improv，再加埋Field Recordings呢亭歐式Jazz編排同音色蝦人聽，所以張《For McCoy》大碟上年只係由阿英子自資出少量，當係了件事。點知近月阿姐突然紅起，令呢張嘢狂炒兼有公司Reissue 。新版由英子緊密戰友Jim O’Rourke重新混音。講咗咁耐，如果你諗住可以當《Drive My Car》前傳咁聽嘅話，Errrr ⋯⋯。前後兩Part全長加埋35:09嘅呢首《 I Can Feel Guilty About Anything》，大家聽咗先：

石橋英子女士2020年底喺東京都世田區Pianola Records一個活動嘅現場鋼琴演奏，又嚟32分鐘一氣呵成。

又如果你真係咁有質素，聽完上面啲嘢之後，都仲係對於呢位精通各樣樂器、視野超廣闊嘅日本音樂人感興趣，強烈建議你要聽佢真正開竅嘅專輯《The Dream My Bones Dream》，佢喺呢張大碟正式將自己腦入面所有唔同音樂種類嘅Partitions拆除，簡單講係個心想點就點。揀咗入面一首作品嘅MV你睇先。

Iron Veil (Official Video) :

唔爭在成張大碟嘞！

The Dream My Bones Dream (Full Album) :

意國當代古典大師廿年首張鋼琴獨奏新曲集
Ludovico Einaudi
Underwater

近兩年以來，每次聽到呢位意大利當代古典大師有新作推出，都會慚愧到無地自容。現年66歲嘅佢，一路話受疫情影響又乜又七，但一路就唔停有作品推出，仲要係叫好叫座。之前我都寫過佢啲電影原聲配樂、七日行山系列唱片同網上直播專輯。家陣仲話因工作程序被打亂，困喺屋企無聊中創作咗20年來第一張純鋼琴獨奏新曲專集！佢話唔使顧時間，正好任由音樂穿透自己身心，向停頓嘅世界發表時代宣言。一聽嗰種清澈純淨又帶些少甜味嘅琴聲，自然明白佢點解會榮登全世界歴來串流播放量最高古典音樂Artist第一位，無「之一」㗎！

Natural Light (Official MV) :

Luminous (Visualizer) :

Underwater (Full Album) :

Bel Canto元祖琴手分享段段短波回憶
Biosphere
Shortwave Memories

如果你講得出，Biosphere 呢一位挪威環境音樂作曲家其實即係比利時廠牌Crammed Discs旗下班霸Bel Canto嘅元組成員Geir Jenssen ，你怕且都有四五十歲。咁你聽佢今次呢張唱片，應該會百感交集。據佢講近年嘅唱片一直都係用Digital Sampler做核心，今次好想停用呢啲嘢同埋啲慣常作曲軟件，模仿返上世紀七八十年代嘅前輩玩類比電子音樂。留意，佢唔係話要做舊時Synth Sound音樂風格，反而係恨個工作過程，即係每粒音都要由0開始program。淨係個唱片名《短波回憶》，已經引起我對於收音機嘅無限回想，你呢？唔講咁多嘢，全張奉上！個唱片封套靚到呢！

Shortwave Memories (Full Album)

黑暗女神最邪釘的大碟《流放劇場》
Nico
Drama Of Exile

有人形容Nico講嘢嘅聲音，似係棺材蓋移動時發出嘅吱吱聲，歌聲又似大堆烏鴉連續起飛13次⋯⋯實在難以想像佢曾經係豔壓群芳嘅超級名模大美人，搞到大明星阿倫迪龍都出盡方法狂追，呢段冒水姻緣引發嘅慘劇當然係另一個故事。事實上，我仲好清楚記得，第一次聽見阿姐鬼聲鬼氣唱《All Tomorrows Parties》時，嚇到完全唔識得反應，但從心底覺得鍾意。今次講嘅係其中一張唔知借咗畀邊個，叫做曾經擁有過嘅舊唱片。圍繞住呢張唱片嘅戲劇性，可能甚至較歌曲內容更耐人尋味。《Drama Of Exile》大碟入面總共有七首原創歌曲，兩首翻唱。首先聽你熟悉嘅呢首，等你容易啲進入佢嘅世界。Bowie首Heroes 呀！