係定喇！等我靜雞雞話過你知
(今集講三宅純新大碟關David Sylvian乜事？又由阿Lam首YUU乃到去Billy Joel日本版細碟大全, 試聽Patricia Wolf張電氣化輓曲, 仲兼了解吓Teip Trio機器有序自毀嘅聲音)
純官疫情中呼朋喚友集結私語花園
ps：David Sylvian請佢食檸檬
Jun Miyake
Whispered Garden
正如和他合作過的大導Wim Wenders所言：「首次進入他的空間，便已上癮。」三宅純(Jun Miyake) 繼參與翩娜包殊傳記電影《Pina》Soundtrack及一系列三幕《Lost Memories Theatre》大碟後，近年雖然零星有創作發表，但始終醞釀已四年嘅個人專集最令人引頸以待。新唱片主題叫《私語花園》，但樂師國界、音樂種類、元素以至野心，全屬歷來最廣大。合作過的女高音Lisa Papineau、負責結他Effect Boxes的Arto Lindsay、又甚至彈奏豎琴的Constance Luzzati和老牌色士風手David Liebman等等，一一排排坐喺純官因疫情隔空架建嘅呢個花園內。音樂風格有乜突破？自己睇黃紙仔。不過有單八卦料，話說唱片內一首《Le Rêve de L’eau》原本一心斟David Sylvian出山主唱，但信件往還傾完幾次後，David 始終覺得「唔想重複自己以往做過嘅嘢」，想改首歌風格就佢咩，但唱片又要趕埋尾。最終，咪就第個唱囉！以下係張唱片嘅Bandcamp Link ，除咗有大碟主題曲你聽之外，其他曲目都可以逐首試聽甚至訂碟。有冇LP？有，自己揾喇！
由阿Lam YUU到Billy Joel日本版細碟全集
Billy Joel
Japanese Single Collection
今次要介紹日本Sony唱片推出嘅日版細碟CD+DVD精選系列最新一彈——Billy Joel！其實真係唔使講嘢，最好講無謂嘢。不過可能講你都唔信，日本版七吋細碟曾經係普遍香港家庭入面唔難搵到嘅音樂媒體。而信和中心地庫家陣間日本寫真集同唱片專賣店，喺80年代中後期一直有大量日本版歐西歌曲細碟出售。今次要講嘅Billy Joel，我當年就有唔少細碟係落信和訂，大約廿皮一張咁啦。好似《Just The Way You Are》同《Honesty 》等大熱，如果廟街精美有行貨， $14搞掂！印象最深刻係佢張1983年大碟《An Innocent Man》，入面連續有兩首快歌電台日播夜播，《Tell Her About It》後又有《Uptown Girl》，未聽過？即係阿Lam之後翻唱嘅《我愛你》，又或者係你家陣去親惠康聽到想嘔嘅YUU呀！搭多一句，其實當年一直戥BJ呢張《無辜男人》大碟唔抵，因為正到可以出7張細碟，可惜一直就被米高積遜(MJ)張《Thriller》壓住。呢啲，咪命囉！細碟當中，我最鍾情呢首靈感來自貝多芬嘅《This Night》：
An Innocent Man (MV)：
Uptown Girl (MV) :
整多兩手早期少少嘅，好聽到呢！
Just The Way You Are (Live MV) :
Don’t Ask Me Why (MV) :
《我會在其他人身上尋找你⋯⋯》
Patricia Wolf
I’ll Look For You in Others
冇錯，從來都覺得女仔人家懂得搞同欣賞精密機器，會有一種好特別嘅性感吸引力。今次要講呢個Patricia Wolf亦唔例外，佢年紀輕輕除咗熟悉好多傳統模組合成器嘅電路同玩法，對於數碼音樂軟件以致專業級嘅現場錄音技術都有相當造詣，馳名於美國Ambient界別及學院派。可能亦因為咁，到家陣都仲係處女 大碟。個唱片名聽落非常慘情，諗真啲仲加陰夠功，《我會喺其他人身上揾你》喎？話說大小姐近年經歷兩次刻骨銘心嘅死別，佢嘗試將莫名傷痛用電腦FFT演算法軟件拆解再重組，化成8段不一樣嘅情感輓曲。趁仲叫做新正頭，揀幾首送過你聽！等你知道，慘，其實都有好多種層次。
Distant Memories ：
I’ll Look For You in Others ：
Letting Go ：
Funeral ：
機器有意地緩慢地自毁發出的聲音
Teip Trio
Teip Trio
如果以標題黨嚟計，呢個問題對於鍾意聽電子音樂嘅我同你會係好很吸引。挪威就有一個即興樂團喺唔小心嘅情況之下搵到以上問題嘅答案。一支電結他，一支Baritone 結他，再加一支單簧管同埋一大堆音效處理器同一份勇者無懼嘅實驗勇氣，呢隊首次埋班錄唱片嘅三重奏，就創作咗一種既有旋律但係又重工業味嘅音樂氛圍。喺呢張同名大碟8首「實驗品」入面，喜歡歐洲風Improvisation 嘅你會聽到能量喺明暗之間嘅起伏，再喺克制情況之下有序加壓邁向引爆，過程引人入勝。
