哈！今次天堂有路你唔走，地獄無門你闖進來！
(老餅時間！今周會睇兩隊德國嘢Faust同Kraftwerk 嘅新碟搞乜, 有Soft Cell同Pet Shop Boys合唱, 又有個Neo Classical女鋼琴家同你講個80年前嘅立志守候故事）
51年後 浮士德幾硬嘅拳頭都只剩低隻中指
Faust
„Daumenbruch“
要講德國Krautrock又或者Kosmische 先驅Faust嘅呢一張第14張錄音室大碟，實在唔可以唔講個唱片封套。1971年樂隊推出第一張唱片時嘅X光拳頭封面設計成為經典，點知40年之後，當年好勇鬥很嘅惡死拳頭最終變成單單只能舉起中指，我等老鬼一見，難免頭拎拎唏噓不已。今次張大碟總共有八個人參與，相較開Band時仲要多出一人。如果要列啲德文水蛇春樂隊名同人名出嚟，其實我已經可以收工唔使寫其他嘢。簡單啲講，兩個Faust元組成員，加Schneider TM低音手Dirk Dresslhaus做膽，整好基本格式，再將音源電郵畀唔同樂手即興加料Overdub上去，當中有打鐵隊伍Einstürzende Neubauten，而最盞鬼嘅係大家完全唔知對方玩乜嘢。咁樣搞法會唔和諧冇協調？唔係囉，三首有啲Dark嘅作品，雖然可算係實驗、New Jazz、工業嘢Fusion，但完全聽得到每一個樂師嘅參與，融合起嚟又非常之咁浮士德！我哋又不妨跟番大碟嘅次序，由第一首長度達到22:54嘅《Weisse Schokolade》聽/睇起 ，呢度係個Official MV。Errr，唔好意思，我長咗少少。
睇到眼花？想純粹聽音樂？都係由第一首聽起。之後歎埋其餘兩首。
Weisse Schokolade：
Default Mood :
Border River :
發電廠炒冷飯奇技 卅秒變八分鐘再Sell 3LP
Kraftwerk
Remixes
一不離二，另一隊德意志老鬼班霸！作為Kraftwerk 咁大個IP，其實早喺20年或者更早之前已經惡晒，基本上想點就點，玩到唱片公司同樂迷一戙都冇。試想，時維2003年，唱片公司同粉絲等足17年，終於聽見佢哋話會推出全新大碟。點知掟出嚟嘅《Tour De France Soundtracks 》，雖然材料全新創作，但初初一見個碟名同埋封套同佢哋自己1983年首《Tour De France》基本上一Q模樣！正常人都會當咗係舊嘢，真係搵鬼幫襯。你話當日唱片公司高層會有乜感覺呢？好嘞。講番今次呢一張《Remixes》，其實亦都喺2020年底時已經推出數碼版本，家陣只不過係正式肯出2CD同埋3黑膠碟咁話唧。唱片19首作品當中，大部份係其他單位嘅重新混音版本。三首叫做Kraftwerk 自己作品當中，最大Sell Point係《Non Stop》，呢首嘢原本係1980年代為MTV寫嘅一條30秒Soundbite，之後樂隊將佢玩成家陣8分鐘嘅模樣。之不過，點講都好，喺家陣咁嘅時勢，Kraftwerk 有嘢你買吓，你都咪話唔係皇恩浩蕩！講多句：今次3LP有廣螢光黃特別版本，隻色同大碟封面一樣，不過只喺樂隊官網接受預訂。價錢？ 75歐元。自己諗！有冇揾丁？願者上釣囉。又不如我哋聽吓首焦點歌曲《Non Stop》先：https://youtu.be/K1egybEb4Gg
唔夠喉？呢度有11 Cut 2020年《Remixes》嘅Digital 版本，今次全套大碟總共有19首。其他嗰啲？買咪有囉！
軟細胞x寵物店男孩=正嘢！之不過⋯⋯
Soft Cell and Pet Shop Boys
Purple Zone
其實只要睇到佢哋兩隊嘢嘅招牌，已經足夠令你隻手有不自禁反射作用打開荷包磅水。1980年代兩大Syn Pop最强二人組首次合作噃？！據官方公布，其實係寵物店男孩兩條友上年底出席軟細胞一場音樂會時，一聽到呢首《紫色地帶》即刻發晒姣，又話好正又主動提出要做Remix，之後彈吓唱吓搞搞吓愈搞愈多，參與比例直程變成同樣咁高咁大。真心講，經PSB搞過嘅呢個版，比原先大碟版本確實更加搶耳，兼且同時間有晒兩隊嘢嘅特色。呀，係喎，唔知由幾時開始，歌曲旋律搶耳同令人好易琅琅上口，會畀人形容到變成殺人不見血嘅洗腦。點都好啦，有咁多個版本，大家安心洗吓腦啦。
Purple Zone (MV) :
Purple Zone (Extended Mix) :
Purple Zone (Lyrics MV) :
Purple Zone (Soft Cell Live Version) :
新古典主義鋼琴家述說80年前耐心的美德
Mirla
Solitaire (The Virtue Of Patience)
來自西澳洲珀斯嘅鋼琴家Emily Mirla Harrison，之前曾經因疫情喺峇里島被強行隔離，當時嘅孤獨同埋苦苦等候心情，令佢聯想起佢嫲嫲同佢講年輕時嘅愛情故事，繼而啟發佢創作呢張概念大調。話說17歲嘅嫲嫲Mirla，喺1942年情人節送別當年只有19歲而被徵召入伍打仗嘅爺爺Arthur。點知兩星期之後，傳來沉船消息，之後爺爺音訊全無。相隔整整兩年後，廿一歲嘅爺爺回歸，透露原來兩度沉船兼且被捉咗去做日本戰俘。佢嘅戰爭經歷之後變咗小說，但係嫲嫲嗰兩年係全不知情狀況下苦苦守候嘅痛苦，一直冇人提。Emily決定將自己嘅處女大碟用嫲嫲名義發表，講述當年苦戀故事之外，亦希望提醒現代人耐心嘅美德。兩年呀喂！人間蒸發生死未卜，寄出嘅信全部冇拆打回頭，你仲會等？家陣你send完WhatsApp， 1分鐘內對方唔睇，你已經發癲啦吓話！咦，唔記得講唱片風格喎！Emily至少學習鋼琴，鍾情拉赫瑪尼諾夫嘅浪漫主義，但近年就最迷Nils Frahm、Ólafur Arnalds同Max Richter，知佢咩料啦？大碟入面除咗鋼琴、弦樂同電子聲音之外，亦都加多咗好多Field Recordings 入去加強觸感。唔講咁多，自己聽。好嘢！Longing :
Patience :
Waltz On Civvy Street :
鍾意？全張一次過！Solitaire (The Virtue Of Patience) – Whole Album :
