你咪嗌囉？你嗌破喉嚨都冇人聽到㗎嘞！
(今次會聽極簡主義電音師太Éliane Radigue 嘅管風琴作品, 又會由㗎妹音響工程師幫你對耳造森林浴, 有古巴天才囡囡擘大對髀邊彈邊唱, 仲有一個車尾箱搵到卡式帶啟發靈感嘅古仔)
90歲電音師太 管風琴玩Drone打動你心
Éliane Radigue & Feédéric Blondy
Occam XXV
今次打頭陣呢位90歲師太Éliane Radigue，絕對稱得上係電子音樂開山祖師。佢1970年代初開始玩類比模組式電子合成器ARP2500，一玩廿幾年，可以數出千百個理由話性能同音調遠遠超越所謂經典嘅Moog，兼仲仲幫架機改埋人名。點解你好似冇聽過師太個大名？原因一個，因為佢獨沽一味，淨係鑽研延長嘅迥音，即係家陣潮人口中講嘅Drone同埋Micro Tunning聲頻微調變化。佢話，世間萬物其實都有無數最細嘅微波，大家嘅耳朵將微小波段聽成聲音，其實我哋身心以致靈魂可以同呢啲微波接觸。佢嘅音樂作品，往往由呢啲好長嘅音頻組成，即使變動亦非常緩慢，可算貫徹極簡主義。今次講嘅呢張唱片《Occam XXV》，奧卡姆剃刀呢個邏輯學（家陣伸展到投資理論）名詞唔知你哋知唔知。簡單講，即係切勿花費多餘功夫做一啲本來可以較少功夫做到嘅事。而呢首基本上唔係點郁嘅作品係佢為管風琴音樂節特別創作，喺演奏家Fédéric Blondy嘅精妙配合之下，全長超過40分鐘一氣呵成，聲音由逐漸積聚以致最終流散歸於沉默，完全感覺唔到幾時變化。又或者，其實聲音一直無變，只係你心情一直變。以下係2019年十月喺巴黎愛樂廳嘅現場演出：
佢其實喺度搞乜鬼？由婆婆自己講清楚：
《紐約時報》以For a Composer at 90, There’s Nothing but Time為題專題報道，我信你會認真去睇㗎！
日裔音響工程師處女作 贈你音頻森林浴
Hinako Omori
a Journey…
三歲已經跟家人移民倫敦定居嘅大森日向子，喺大學主修音樂及錄音技術，原先諗住會做音響工程師，之後陰差陽錯，開始玩電子音樂，拓展自己嘅作曲事業，亦對音頻治療法產生莫大興趣。佢話，佢祖家日本嘅森林浴自然療法，可以透過環境幫人減壓、提升記憶力專注力，甚至可以加強免疫系統同降血壓。佢就想透過第一張個人大碟，用聲音同大家對耳做森林浴。根據佢嘅理論，唔同頻率可以將大腦牽引到不同狀態。當中，Delta(0.5-4Hz)嘅波長可以啟動深度恢復性睡眠及康復功能，Theta(4-7Hz)更加有助創意、直覺及情緒管理。喺張唱片入面，佢喺唔同嘅音樂將音頻調校到腦電波一致嘅頻率，究竟最終有乜嘢療效？你逐首聽吓咪知囉！不過飲效果唔好搵我。
Will You Listen In :
a journey (MV) :
The Richest Garden In Your Memory (MV) :
Snow (MV) :
來自古巴 一隻大提琴一把歌聲一Take過
Ana Carla Maza
Bahía
芳齡26歲古巴裔作曲家/大提琴家兼歌手Ana Carla Maza出生音樂世家，5歲開始學鋼琴， 10歲已經上台同資深爵士樂師演奏。到14歲佢開始質疑下半生係咪淨係可以玩呢啲全部由麻甩佬創作嘅爵士樂，一次機會令佢愛上咗大提琴，開展佢之後一直擘大對髀演奏嘅生涯。喺佢呢張全新嘅唱片入面，佢將古巴傳統嘅Son、巴西嘅Samba同Bossa Nova、阿根廷嘅Tango及法式Chanson融會貫通，變成9首屬於佢自己嘅音樂，其中有8首都只係得一隻大提琴同佢把歌聲一Take過錄音完成。最後一首加咗鋼琴，因為係紀念佢小時第一個鋼琴老師Mirim Valdés，佢憶述，古巴到1980年代都冇影印機，老師要為每一個學生用人手逐張去寫樂譜，令佢銘記於心。
Miriam Valdés：
Astor Piazzolla：
Bohía：
Making Of Bohía :
Bohía (Quartet Live Clip) :
喺二手車車尾箱有堆卡式帶 結果變成⋯⋯
Tony Price
Mark VI
本名Anthony Nemet嘅Tony Price，絕對係美加另類樂壇多才多藝嘅監製，Garage、Alternative 、Jazz、Funk樣樣皆能。即使曾經出過一張咁多電子音樂唱片，但絕對唔係電音人。不過，佢今次忍唔住要玩第二張。話說Tony兩年前機緣巧合向一個新墨西哥退休DJ買咗架古董Lincoln Continental Mark VI，喺車尾箱搵到一堆老爺錄音帶。就喺佢將架車揸返多倫多旅程入面，佢手痕將呢啲1990年代末Techno 同House風味嘅Mixtape一直咁播嚟聽，發現呢啲聲音其實已經變到遙不可及。佢決定用全新手法向當年紅極一時嘅聲音致敬，講到創新當然唔會係就咁玩Cover Version啦。大家喺呢張純音樂概念唱片入面，睇吓又聽唔聽得到你當年跳到腳軟身水身汗嘅某啲元素？喺以下呢首音樂，撞鬼我就竟然好似聽到死鬼Mick Karn嘅低音結他咁?！
Learning From Las Vegas：
132 BPM：
Turbo (Dub)：
Mark VI：
