黃紙仔音樂畫符 - 陳行 #109【專欄】

如果你真係愛佢，就更加應該離開佢

(今集會講David Sylvian 同George Michael兩單Reissue, 風格同道德上有好大差別, 又會介紹捷克結他手Tomáš Niesner 一張苦行救贖大碟, 仲會聽英國靚聲女王Anne Garner嘅天籟)

12年後重現的夢遊者有一點抱憾

David Sylvian
Sleepwalker

一向對David Sylvian有一份好聽啲叫做尊敬，唔好聽就叫做妒忌嘅感覺，因為佢可以從來忠於自己，完全唔諗理(噢，打多咗字)其他人點睇。佢講過：「作為老一脱Artist，叫做有老本食，即使明知失敗機會大，亦有道德責任去開拓多啲新領域，唔應該沉醉用啲舊嘢討好舊粉⋯⋯」事實上，條友身體力行，推晒所有可以食老本出碟巡迴演唱賺錢機會，隱居喺深山，得閒溝吓女影吓相做吓設計，近月先至開始喺社交媒體同學迷直接對話，推介坊間詩歌油畫甚至最新電影。儘管完全冇新唱片出，但總要詢眾要求推出衍生工具應吓市嘅。上年幫佢推出過攝影集嘅Grönland 剛剛公布，David Sylvian喺2010年推出嘅年代精選《Sleepwalkers》會有2.0版喺6月10日發行。呢張唱片當然收錄咗好多佢同唔同人合作一Q過嘅作品，今次新版本曲目原本打算完全唔改，點知有兩首歌版權人拒絕放行（其中一首《Playground Martyrs》屬於佢細佬Steve Jansen，即是兄弟咩牆⋯⋯)，所以最後用另外三首作品取代，希望可以有相當份量又或者好過以前。值得開心嘅係，今次加入咗2011年佢同Jan Bang為日本311海嘯籌款振災而作嘅《Modern Interior》⋯⋯咦，咪住，唱片公司同Sylvian官網新碟資料上面歌名點解係《Modern Interiors》嘅？點都唔信個S會係另一個版喇吓話？又睇六月黑膠碟推出時，是否有多一浸校對幫忙修正？做咗幾十年專執人錯漏嘅工，忍唔住講多一單：仲記得張偉文N年前未變靚聲王，難得有復刻精選CD推出時，封底歌名入面首《桃李透豔紅》，桃字打咗挑，變成「挑」李透豔紅。搞到我家陣每次見到佢同類精選唱片，都要反轉望一望。

Modern Interior :

Do You Know Me now ? :

World Citizen :

Sylvian官網有條完全版水蛇春，逐首歌咁去講，不過似乎係用唔同時空嘅資料拼貼成，加上大哥講嘢有時比較玄，所以睇要有啲耐性。

About Sleepwalkers 2.0 :

http://davidsylvian.com/sleepwalkers2022/

荷索啓發捷克結他手以苦行冀救病河

Tomáš Niesner
Bečvou

捷克Noise Rock樂團Unna 及Vlnena結他手Tomáš Niesner 長年生活喺重音壓下，開始感覺聽力下降，近年轉彈Acoustic結他。咁啱兩年前，一單你同我都唔會知道嘅新聞令佢覺得好傷心，傷心到要整一張唱片係抒發。話說捷克東部一條名為Bečva嘅河流，承載住佢好多少年回憶，由於遭到工業園區一宗污染災難影響，波及沿流幾十公里所有嘅人同動植物生態，需要15年先至有機會復原。佢睇書知道德國導演荷索有種用不停行路跟上天談判嘅苦行技巧，照辦煮碗沿着河流行咗幾十公里希望蒼天開恩拯救條河。期間佢仲一路用錄音機錄低晒條河嘅病情同埋喘息聲音，返到錄音室糅合自己以前同家陣嘅結他技巧去描畫整個過程。結果，佢完成咗呢一張第二張個人大碟。我又即管揀咗三首歌曲畀大家試聽，唔好問我啲歌名乜嘢意思，自己Google Translate喇！

K Břehům :

Pod Lipami :

Fragment :

想要聽全張。Bečvou (Whole Album) :

一種介乎Elizabeth Fazer與Jonsi之間的歌聲

Anne Garner

Dear Unknown

2006年同監製James Murray一齊由Sheffield搬咗去倫敦發展嘅唱作人/歌手Anne Garner，基於佢嗰把被形容為介乎Elizabeth Fazer與Jonsi之間嘅神秘歌聲，一向有佢一個Cult嘅追隨者，兼且信眾與日俱增。今次呢張《Dear Unknown》不單秉承過去幾張大碟嘅Unclassified 音樂風格，更加大力度重點Sell嗰份懸而未決曖昧嘅親暱。佢用鋼琴、笛、同電子合成器造咗一個夢一樣嘅背景，將你周圍整個時間觀念拖慢，等你可以慢慢慢慢咁樣去欣賞佢含氧量極高歌聲嘅每一個細節，同埋每一個音符之間白位嘅起伏。唱片主題講乜？佢話有關於復原同治癒，講嘅唔係疫情，係比疫情更加靈性嘅體驗，希望借音樂表達宗教以外嘅生和死感覺。唔明？自己感受一下啦。

Dear Unknown :

Besides :

Surrender :

照例，成張大碟上。值得一提，佢張新唱片嘅CD採用手作仔方法印製，值得捧場。

佐治米高生前同Sony勢成水火總有原因嘅

George Michael
Older (2022 Reissue)

要講佐治米高同一手由Wham! 時期捧佢出嚟嘅舊唱片公司Sony之間嘅恩恩怨怨，真係書都可以寫到本。我哋講重點：話說George同Sony不和，至1992年狀告公司敗訴，換來幾年空白期之後，結果由新公司DreamWorks以天價幫佢翻身，推出呢一張叫做平衡到各方利益同創作自由嘅大碟《Older》。當年，唱片反應亦非常好，只係美國佬頂唔順。最令人覺得諷刺嘅係，George臨死之前最終又跟番Sony，而呢張《Older》嘅版權亦輾轉由Sony買番。好嘞，呢張咁好聽嘅唱片今個月有消息話重新發行，有唔同顏色嘅LP，兼且有一個3LP+5CD嘅大全盒推出。你估吓會有幾多首未曝光過嘅作品或者特別版本出土推出呢？答案係：冇！唱片公司信誓旦旦話未出過街嘅一首《Spinning The Wheel》Jon Douglas Remix其實亦喺當年嘅Remixes CD Single出過，只係負責今次個Project或者寫新聞稿嘅，根本唔係佐治米高歌迷啫。可能佢哋最上心嘅係，雙碟Vinyl究竟要出幾多隻顏色賺到最多嘅錢？忠粉睇到曲目歌單，可以講係人睇人「小」，絕無誇張。仲有，最神經嘅係，雖然唱片執埋執埋有搞出成5張CD，包括一大堆Radio Edit 及Remix版本舊嘢，但到目前為止冇得獨立買，要聽CD就要買嗰個千九幾蚊嘅大全盒。服未？有條開盒短片講今次呢個全盒版本嘅《Older》，我冇興趣囉！