黃紙仔音樂畫符 - 陳行 #111【專欄】

你得到我個人，但係得唔到我個心嘅⋯⋯

(今集我哋聽芬蘭妹Lau Nau同三個美國仔喺2019錄低嘅嘅開心日子, 又有Lawrence English用暴風聲砌成嘅Field Recording組曲, 試睇近年第二部關The Smiths事嘅戲, 仲會同大家返去1981睇英美樂壇大戰）

這張手作仔唱片記錄了2019盛夏歡樂時光

Sontag Shogun x Lau Nau

Valo Siroutuu

2019年夏季，當全世界仲未知道應該要享受難得嘅平靜時，美國紐約新古典三人組Santag Shogan遠赴芬蘭以樂會友，同當地唱作人女歌手Laura Naukkarinen(佢一向自稱Lau Nau)喺Kimitoön小鎮Hea過一段時間。可能，創作音樂只係藉口，三男一女偷懶玩樂至係主菜。呢張啱啱推出嘅唱片，與其話係歌集，不如講係佢哋用咗當日大堆錄低嘅無謂閑雜聲音，加入最簡單音樂，再配上英文同芬蘭語唱出嘅少量無聊歌詞，為歡樂時光做記錄。話時話，如果開心快樂真係可以用聲音記錄，你有冇後悔冇錄低過啲乜嘢呢？呢張唱片除咗有Digital同黑膠碟推出之外，你亦可以配襯一本歌詞畫集，不過兩樣嘢都係得幾百件，買唔買到睇你緣份。唔打算嘥口水，想知嗰陣有幾開心，全張大碟自己聽：

Valo Siroutuu | Sontag Shogun x Lau Nau | Sontag Shogun

Field Recording經典：風暴聲中你會記起些什麼？

Lawrence English

Viento (Remastered 2022)

上次介紹過Lawrence English全張只有海浪聲嘅大碟《’Oseni》，聽到啲人話超無謂兼唔知想點，所以今次要執多劑淨風聲！《Viento》係以為澳洲音樂家係2010年應邀前往南極旅程上嘅經歷。唱片入面分別錄低咗一次超級風暴同一次暴風雪嘅咆哮，Lawrence 講明影響咗佢一世，每次聽返錄音都有唔同回憶同感受，亦清楚了解到自己喺空流當中實際渺小到同一粒塵冇分別。Field Recording往往應用純天然聲音，經唔同編排創作所謂嘅「音樂」，唔同人喺唔同時間聽到，都會有唔同嘅往事浮現，又睇吓你諗起啲乜嘢？

Viento | Lawrence English

若你迷過The Smiths，你會明仲兼且好明

Shoplifters Of The World Movie

Director : Stephen Kijak

之前睇過以Morrissey碰上Johnny Marr組成The Smiths前故事做基礎嘅一部《England Is Mine》，叫做OK喇呢類戲，所以對於另一齣The Smiths電影《Shoplifters of the World》其實冇任何期望，估計係美國導演Stephen Kijak繼《Scott Walker：30 Century Man》後對呢隊佢心愛又被譽為世上最偉大樂隊嘅一封情書，不過無聊得來其實幾好Feel，Fans睇落有好多細位應該好開心。套戲故事講四個喺美國丹佛嘅年輕人，聽到樂隊宣布散Band之後嗰一日各自心入面嘅愁滋味變化出乜嘢事。除咗有20首The Smiths金曲伴住青春期各種迷惘橋段推進之外，樂隊紀錄片同埋當其時樂壇一啲人和事都穿插片中。嗱，又姑且冒住劇透死全家嘅危險都要舉個例，電影最後一幕男女主角嘅對答係：咁家陣我哋去邊？答：Take Me Anywhere I Don’t Care I Don’t Care ⋯⋯。明就明喇吓話？

Shoplifters of the World (Trailer) :

要睇全套戲其實好易，有一種譯法叫做《世上的扒手》，雖然譯到不能再差，不過用呢個名搜尋一定揾到套戲嚟睇。又不如睇多段先吖？

片中一個唱片舖售貨員知道噩耗之後，帶埋槍走去一個只播美國重金屬音樂嘅電台，要脅本身迷Kiss嘅長毛DJ全晚只可以播The Smiths歌，以向好朋友示愛，結果竟然感動咗個DJ迷上埋，咁樣嘅橋段係咪好咩呢？

OMD撼低過ONJ – ‘81 英倫音樂侵美最強記錄

Various Artists

Now Yearbook ‘81

1981年絕對係外國流行音樂好重要嘅一年。就以香港為例，原本個個星期專注美國流行榜嘅電台，喺呢一年突然播多咗好多英國古靈精怪歌曲，其中最重要嘅係新浪漫電子音樂。Now Yearbook系列最新一集玩’81，喺總共85首選曲入面，正正就顯示到英美流行音樂史上其中一次最大規模嘅大戰。唱片入面同時有Smokey Robinson、Earth Wind & Fire、Kim Carnes，但又有Duran Duran、Japan、The Human League又甚主Department S！你同CD有豪華硬皮書版本，可謂圖文並茂。要L P ？有紅膠，不過冇書兼且三張碟只有46首作品。話時話，人老咗發現通街愈來愈多嘢好似係必然咁。點解明係少咁多嘢又貴但一定要買Vinyl呢喂？唔係話膠就一定係好喎，買CD有咩問題呢又，咪個一味只顧盲目趕時髦喇吓話？！