嗰晚之後，我就有咗你嘞
(今集講到Benjamin Biolay筆下廿年來最靚法國片配樂, 有Claire Rousay 用無謂聲音砌成完美大碟, 仲有Kelly Lee Owens介乎Throbbing Gristle同Enya之間嘅新唱片, 最後加多支播住Metallica經典釀嘅威士忌)
Benjamin Biolay
Et j’aime à la fureur (Bande originale du film)
嗱，真係有咁啱時得咁蹺，啱啱收到消息話《星光伴我心》入面飾演成長後Toto嘅演員Jacques Perrin逝世，轉頭睇到套用業餘家庭菲林片砌成嘅自傳紀錄片《乜得我成日嬲爆爆》大橋，竟然有幾成相似。話說導演André Bonzel 卅年前同人夾份拍過一套戲之後，拍檔自殺令佢亦再無拍嘢。神推鬼拱下，一個喺美國嘅親戚因為病重將大堆儲咗幾代嘅超8菲林交托畀佢。睇返呢堆佢唔知道存在嘅影片，佢見到細個時候嘅自己，憶及係佢同阿爸嘅關係令佢匿喺戲院會上電影；又重見唔同時代嘅女朋友同埋現今嘅太太。一道莫名嘅火，令佢挖出自細儲起嘅無謂超8菲林同家庭生活錄影帶，混和呢一大堆家族老影片，砌成一部橫跨幾十年嘅半自傳電影。佢話希望大家留意片中佢無聊一生嘅周圍左右，可以作為一個媒介回憶起自己昔日嘅日子。萬事俱備，只欠一種可以幫助大家走入時光隧道嘅美麗音樂，佢搵咗當下少咗醜聞叫做鉛華洗盡嘅法蘭西第一音樂才子Benjamin Biolay幫手。結果，Ben仔亦交出自己最美好嘅少年回憶，寫咗65首短音樂伴襯畫面，當中有老爵士、華爾滋及至弦樂四重奏，有鋼琴、手風琴、結他同小風笛，總之你印象中最美麗嘅法國電影聲音，全部喺唔同層次重現。無誇張，近廿年來，未聽過一張法國戲配樂唱片可以有咁靚！望住個唱片封套，都夠開心啦。
Et j’aime à la fureur套戲嘅Trailer：
用生活周遭最微細聲音譜寫你回憶中夢境
Claire Rousay
Everything Perfect Is Already Here
生活喺美國德薩斯州San Antonio 嘅Claire Rousay堪稱無聊界嘅一代宗師。佢自認每日大約有18個鐘頭不停造Field Recording，用全屋裝置同隨身帶嘅錄音器材錄低自己周遭所有聲音，喺入面揾元素來做創作，例如用揸皺紙張、打火機點煙再加閂門聲音加零碎人聲去表達某種特定情感。無謂？唔知做乜？強如坂本龍一都係到鬼門關前先至頓悟身邊自然界聲音嘅奧妙咋。Claire最新嘅大碟，完成度可以講係歷來最高，對於傳統音樂旋律嘅抗拒亦相對冇以往咁高。換嚟嘅係，兩個極端音樂世界嘅一次互連。喺風聲、腳步聲同埋一啲不知名聲音當中，你亦可以聽到優美嘅小提琴、鋼琴同埋豎琴演奏，最重要嘅係，呢啲只係配樂，你可以靜心聽自己心入面最微細嘅動靜。全張碟兩首音樂，學佢話齋：所有完美嘅嘢其實已經喺齊度：
壯志未酬衍生品 Throbbing Gristle x Enya
Kelly Lee Owens
LP.8
望返轉頭至識驚，原來之前喺度介紹佢上一張大碟《Inner Song》，已經係2020年產物。嗰張唱片全球得到莫大反應，評論界同學迷都拍爛手掌，大小姐原本諗住全球巡迴演奏，但係計劃被疫情打斷。谷到行晒點好？佢一個唔該搭最後一班機去咗挪威奧斯陸。把口就話唔知想點，但去到冇耐已經搵咗以前幫Sunn O)))同佢老友Jenny Hval合作開嘅Lasse Marhang闢室尋歡，入錄音室過招。Kelly攤開晒自己，自爆鍾意Throbbing Gristle嘅同事，沖涼時亦會唱Enya嗰啲Sail Away Sail Away Sail Away。好嘞，一個月時間珠胎暗結只有東窗事發，佢通知唱片公司準備接生。佢嘅第三張大碟就叫《LP.8》，氣氛冰冷撈空靈，機械化但有旋律，得喎！全碟9首，一Q過！
係咪㗎？「焚」住Metallica大碟釀威士忌
Blackened x Metallica
Rye The Lightning Limited Edition Whiskey
叫做做咗廿年爛鬼編輯，到今時今日見到食字都總有啲感覺。用Rye代Ride，叫做OK啦。Blackened呢一類美國佬威士忌，就係因為多過e字，從來都唔係我杯酒。不過，呢間酒廠開宗明義有「Black Noise」秘技，話要播住Metallica唔同大碟震動木桶，會令桶中威士忌喺分子層面同木之間加強融和，味道同色水都會優化。今次玩《Ride The Lightning 》，仲講到明唔用大碟版本，要揀2012年6月喺Orion Music +嗰次全張大碟由尾玩返上頭嘅現場錄音版本，再經重新混音先至用嚟播放釀酒。有乜Q嘢唔同？唔好問我。就好似所謂音響發燒友嗰一套，總之明嘅明、信嘅信、聽到嘅就聽到，家陣搵食啫！嗱，你想望多兩眼Blackened搞乜、創辦人兼上一代調酒師Dave Pickerell、新調酒師Rob Dietrich同Metallica之間嘅關係？
約飲酒就無謂啦，酒吧未開我又咩嘢咗吖嘛。不過講到咁巴閉嘅嗰場音樂會，可以請你睇嘅。
2012 Orion+ Live Version of The Album 《Ride The Lightning 》：
