呢條大泡和無端白事貢出嚟，搞喎晒成單嘢！
(今集介紹TIBSLC希治閣式環境音樂, Dave Brubeck唯一一次四重奏變Trio, 又有Tuxedomoon阿Steven Brown個人大碟, 同埋Ry Cooder夾Taj Mahal唱藍音玩致敬)
國際億萬富豪秘密愛子的超透明聲音
TIBSLC
Hypertranslucent
曼徹斯特電子音樂新進廠牌講到明唔希望佢哋嘅產品只係為你嘅實體環境造配樂，反而係想締造一個新空間畀你去思考。佢哋上年幫德國萊比錫電音人TIBSLC推出首張大碟《Delusive Tongue Shifts – Situation Based Compositions》反應超乎想像，雙張LP高速賣晒。出自同一個錄音Session嘅第二彈《超透明》剛剛推出，名副其實用透明膠印，限量500張。咪住，個隊名TIBSLC全寫係International Billionaire’s Secret Love Child，個名咁很畸形，學證監會話齋，買之前你真係要了解佢啲音樂搞乜先囉。據唱片公司形容，大碟內嘅聲音比上一次雙唱片簡潔，係用黃昏城市入面唔同人生活嘅希治閣式偷窺快拍交織而成。有街道上嘅低頻襯底，本身帶有夢想能量同埋樂觀情緒，但八首歌名完全一樣嘅作品亦會喚起精神錯亂感覺，令人陷入生命中不能承受的輕的沉思。咁即係點？唔好我講，你自己聽。不過可以講一句，你唔好問我啲聲用乜嘢樂器雕出嚟。
佢上張碟嘅一首Nightmode：
拍檔累事？Dave Brubeck Trio唯一一次演出
Dave Brubeck Trio
Live From Vienna 1967
之前同大家講過，百分百正常人Dave Brubeck拍住不良嗜好瓣瓣齊嘅色士風手Paul Desmond真係唔知好嬲定好笑，不過佢哋嘅化學作用一直係經典。今次呢單嘢又係多得Paul唔少，話說1967年11月12日，以Dave為首嘅Quartet簽好約收晒錢要喺維也納表演。點知阿Paul臨上機之前嗰晚喺漢堡玩大咗而No Show！可能部分因為呢單嘢，呢個夢幻組合四人樂團就喺冇耐之後解散，你可以想像作為領班嘅Dave當日其實有幾嬲。好嘞，雖然得三個人，但收咗人錢點都要頂硬上。結果點？雖然嗰晚只係演奏咗六首歌，全程唔夠一個鐘頭，不過喺Dave嘅超級壓力下，佢哋三人組玩出特別編排嘅音樂，非單唔因為少咗個人有缺失，反而比四重奏更加玩出另一種動感同層次。唱片現場錄音入面嘅觀眾掌聲雷動，已經係最好證明。又唔信？自己聽：
Tuxedomoon阿棕先生近卅年首推個人大碟
Steven Brown
El Hombre Invisible
喺上世紀80年代初，Tuxedoomoon絕對係一隊意想不到係來自美國嘅後崩樂隊，佢哋無論風格同樂器演奏都非常獨特，齋睇佢哋高速移植歐洲發展，單單一首《In a Manner of Speaking》就先後有DM個Martin Gore同Nouvelle Vague翻唱，就大概估到咩料。樂隊孤高自我，核心成員Steven Brown更甚。佢一早厭棄美國污煙漳氣轉去歐洲發展，點知一次班機延誤會令佢突然愛上咗墨西哥，一住就住咗近卅年。你可能會覺得，無論佢個人甚至樂隊都好似唔係想搵食咁。事實真喎。Steven喺墨西哥瓦哈卡起屋定居之外，平日每周都會喺屋企定期搞古老電影播放會，仲搵埋啲唔同樂師一齊重新製作音樂現場演奏，總之好Feel為要。佢剛剛宣佈，推出近30年嚟第一張個人大碟《隱形人》。風格？基於上述咁閑適寫意嘅生活，你估吓會係點呢？佢除咗一手包辦曲詞、鋼琴、結他、Bass、色士風同少量管樂之外，又拉埋Tuxedomoon舊隊友Luc Van Lieshout幫手伴奏。唱片中心思想要講嘅就係咁多年來呢啲好基本好舒服嘅生活。仲想點呀喂？！
Resist (Official Music Video)
Dutiful Beautiful :
El Humbre Invisible ( Whole Album) :
七老八十Ry Cooder Taj Mahal向藍音前輩致敬
Taj Mahal & Ry Cooder
Get On Board
佢兩個喺美國藍調音樂以至流行音樂界享負盛名，兼且不時台上合作，唔講唔知原來識於微時。Taj喺1968年製作首張大碟時，已經搵嗰陣得21歲嘅Ry幫手彈結他。三年之後，兩個人更加入一隊叫做Rising Sons嘅樂隊，但錄好唱片點知最後冇得出，變成憾事。大家都七老八十 ，咁啱講起當年一見如故係因為彼此都咁鍾意聽Sonny Terry & Brownie McGhee，話呢對Piedmont Blues經典組合雖然一個盲眼一個高低腳，但係技藝超群至今無人能及。講得興起，決定徴用Ry阿仔Joachim屋企個大廳兼拉埋佢打鼓彈Bass，要錄一張大碟全部玩Sonny & Brownie作品咁話。就係咁，佢哋幾乎純現場錄音做咗十一首歌，話要令後世人知道前輩有幾巴閉，當然亦都包括佢哋自己喇吓話！
Cornbread, Peas, Black Molasses (Official Video) :
Hooray Hooray (Official Video) :
講咗咁耐，聽番首原裝Sonny Terry & Brownie McGhee嘅《Long Way From Home》。八單嘢畀你地聽，呢兩條友拍檔多年，不過其實好唔妥對方。台下從來冇偈傾，坐車搭飛機都要確保分開坐，一唔對路即刻走人。
Bonus Track ：臨交稿突然諗起，好多年前阿倫柏加電影《天使追魂》入面，就搵咗Brownie McGhee飾演一名藍調歌手，兼主唱自己一首舊歌《Rainy Day》，呢首歌好聽到不能。
