坂本龍一 「搞白事」?最新7+1 全白膠唱片錦盒 送埋幾紥香畀你燃點供奉!【文化者.收風】

教授音容素描

正當大家忐忑不安,憂心坂本龍一四月份嗰三場瘋狂炒黃牛飛嘅演奏會到底開唔開得成之際,唔少人亦開始思考究竟何謂大師?好嘞,唔使費心神嘞,龍哥以實際行動證實俾你睇。

近幾個月以來,他老人家博老命,連環出咗幾部電影嘅配樂之外,亦推出一盒正式可以用作供奉嘅禮盒,唔係講笑亦唔係黑心,除咗全部唱片用白膠印,搞白事咁樣之外,入面堅係有埋紥香畀你燃點供奉㗎真係。

講緊嘅呢盒嘢名叫:Ryuichi Sakamoto 2019【完全生産限定盤】,全宇宙只生產200份,由佢老人家自家品牌Commmons推出。盒入面除咗包括七張12吋重磅白膠唱片同埋一張七吋白膠細碟之外,亦包括一批親筆樂譜文案、一幀佢音容宛在嘅畫像素描。最令人不知所措嘅係揾咗京都傳統線香老舖特別製作佢最鍾意聞嘅香。到時,你大可以聽住音樂,望住畫像,再聞到燃點中香嘅味,成套儀式就只差一個確定消息,你話幾完美呢可? !

封面

講返音樂,呢盒嘢亦實在令版本龍一迷不知點算好。因為今次絕非例牌炒冷飯,且看我介紹七張大碟及細碟內容:

1)上季Netflix 電視劇《Black Mirror》當中《Smithereens》配樂19首,全長34分鐘。
2)半野喜弘電影《Paradis Next》未發表過實體唱片嘅配樂,九首音樂全長27分鐘。
3)2017年電影《瀬長亀次郎》未發表配樂,五首作品全長21分鐘。
4)近日網上爆紅華倫天奴創作總監與導演Luca Guadagnin合拍作品《The Staggering Girl》配樂,11 Cut共21分鐘。
5)Eva Green 主演太空人電影《Proxima》配樂,15首共30分鐘。
6-7)韓國卡通《霸王龍︰永遠永遠在一起》配樂,35 tracks足兩張膠片全長63分鐘。

7+1 全白膠唱片套裝

你會問,咁張7吋細碟呢?今次大鑊了!佢老哥驚你嫌佢唔夠誠意,專程為呢盒嘢寫咗一首全新作品,收錄喺呢張白色膠細碟發表。 Box set 由外面樹木年輪概念設計封面,以至盒內教授手寫樂譜文案用嘅唐紙成分、印刷及設計製法極度講究。入面其他嘢亦絕對唔係講笑。佢幅由攝影師Pierre Even拍照,再由韓國畫家KO JIMAN用鉛筆素描繪畫嘅肖像細密画複製品,成幅Size係w315mm×h315mm(畫本身w195mm×h190mm)。至於啲香,亦由京都三百年歷史老舖松榮堂專制,香分為:正覺5支・南薫 5支・王奢香 15支,每支11cm;香座由職人渡辺遼謹製 。每個細節基本上可以當藝術品玩味。

香及香座介紹

好啦,講咗咁耐,成單「白事」每一個位都去到咁盡,而又限量200件,究竟埋單找數要幾多錢呢?答案係110,000日圓,折合即係大約$7700港幣,鋪頭加郵費計十算足足要過萬蚊港幣。究竟係唔係貴?又值唔值得去追捧呢又?呢個其實係財經題,亦入於哲學題。正當安悅國際控股呢亭股票,可以單日升120%成為十大升幅之首,而閣下又唔再去排隊買廁紙,足足嘥咗咁多時間睇我呢一大堆字嘅話,其實你心入面已經畀咗答案你自己。

成世人流流長,無謂錢應該嘥過唔少,睇怕亦唔差呢一次。十年之後,如果有命打開你盒嘢,應該百般滋味在心頭,喺香港最危急關頭你搞呢啲咁嘢。能夠有呢種魅力,呢啲咪就係大師,要用香嚟供奉嘅神囉。

教授親筆樂譜

撰文:陳行(信和中心CD交易所唔睬人嗰個)

留言