「以前我哋摒棄嘅嘢、嫌棄嘅嘢點知畀外國人睇話好 cyberpunk，姐係 Ghost in the Shell 嗰類電影，荷李活嗰啲導演又走嚟睇、拍攝啲後巷，我哋都嘖嘖稱奇，點解污糟嗰啲佢又咁鍾意嘅。然後呢幾年我哋先開始慢慢反省咩叫香港文化、咩叫香港設計。」Brian 感嘆。
字體保育工作的緣起
郭斯恆 Brian，理工大學傳意設計系助理教授，著有「香港街道研究三部曲」，包括《我是街道觀察員》、《霓虹黯色》與《香港造字匠》。一路走來，Brian 的興趣似乎也離不開「視覺」、「文化」和「傳意」這幾個關鍵字，他早年於外國修讀設計，對視覺文化、視覺傳意深感興趣，學成歸來到理大任教至今，曾於中文大學新聞與傳播學院深造，碩士畢業論文也順理成章與香港街道文化相關，及後編改成《我是街道觀察員》一書，研究的街道是從小長大的地方——花園街。
《我是街道觀察員》從城市空間理論出發，再微觀花園街裏頭的各種細節。習得各種文化理論，也曾到場觀察、實踐、研究，Brian 同時留意到街道上的霓虹招牌飛快地消失，他當時思考是否能夠將街道研究的經驗，配合從傳意設計所學的知識「去做返啲嘢」？
「純粹係救得幾多視覺文化，盡量保留咗落嚟先，如果冇人去記錄，我覺得係一件好可惜嘅事。因為真係唔知佢幾時拆，啲店舖又唔會話畀你聽，甚至乎佢哋都唔知屋宇署幾時發信要清拆，所以就同時間鬥快。當然之前不嬲都有人影字體呀、招牌呀、霓虹燈嘅，但係你話有一個規模啲，或者比較 systematic 啲，甚至連繫返去視覺文化（嘅做法就少啲）。」
由影相開始 到建立完整資料庫
雖有「諗頭」，但落手做研究還是從簡單的一張張照片開始，先用 Google Map 記下不同招牌的位置，然後走訪每條街道拍下相片，留個檔案做記錄，後來才慢慢發展出一套清晰、有邏輯的研究資料庫。
「除咗北魏體之外，仲有啲咩字體呢？有冇規定或者連結，係咪某啲舖頭會鍾意某啲特定嘅顏色、字款或者字體呢？或者一啲新派嘅行業同店舖，會唔會有特定嘅喜好呢？」Brian 從一張張的招牌相，開始思考招牌的造工、字型，再延伸至整個設計與店舖、街道之間的關係，以及這幅偌大的招牌風景背後所隱含的視覺文化。
其中一個例子是在五、六十年代，當時大家不為意，但 Brian 做研究回頭看，發現香港霓虹燈的設計受一種叫 Art Deco 的美學、裝飾藝術影響。有趣的是，這種風格由西方在三、四十年代傳入上海，之後因為內戰，很多藝術家、工藝家隨着資本走來香港，也將這種美學帶來香港。從這些蛛絲馬跡，我們可發掘出更多香港視覺文化相關的歷史，拼湊出更完整的視覺文化發展脈絡。
現時 Brian 已建立了一個頗為完整的香港霓虹燈資料庫，當中每一張招牌的相片會附以地圖在旁，再加上「現有 / 已拆除」、「店舖類型」、「字型」、「底色」等 標籤（tags），方便研究與大眾搜尋。
為何失去了就很可惜？
Brian 提及的保育起始動機很純粹：招牌是好個東西，政府拆得好快，拆了很可惜，所以要記錄、要保育。但，為何可惜？
「一講開字體、字型，你會諗起日本、台灣、中國，但係香港就永遠都係缺席。點解會係咁呢？事實上又唔係冇吖嘛！咁所以我希望話畀人聽，香港其實有人喺到做緊㗎。」Brian 認為這些字型不知不覺間，其實構建了香港街道獨特的視覺景觀，以至香港獨有的視覺文化——香港是一個字型以及設計多樣、混雜並且包容的地方。我們的日常生活被街道上、電子螢幕上充斥的各式各樣與字體相關的設計所包圍，當中有霓虹燈字、燈箱廣告字、貨車字、電視電影標題字等等。
一座城市的意象越強烈，就能提供人越清晰的城市印象，以及越強烈的情感聯繫，因為當中往往涉及長時間居住者與城市、社區的關係，例如老一輩約人會說在麥文記（招牌下）等，長久之下產生大量集體回憶。這種獨特的視覺文化不單止有助香港建立其獨特性、可辨度，還可構成香港文化底蘊和修養的其中一個部分，使我們對自己身處的地方、社區有更強的歸屬感和認同感。
以《造字匠》中的電視標題字為例
你平時會有幾留意電視劇或電影的標題字？講起港產片，你可能真的聯繫不了，但當談及日劇、動漫片頭，你卻會對它們有更深印象，因為創作者會根據每集劇情，將標題字咭以動畫的形式融入其中。標題字雖不起眼卻十分重要，它是整個節目的視覺載體，將節目的要旨設計於其中，它亦是節目品牌的重要元素，從現在的推廣活動可見，藝人切燒豬、玩遊戲背後的佈景板，正是大大隻的標題字。
其實當你細心留意，港產片也會有類似操作，不過這種做法要數到九十年代之後。「因為節目多元化咗，嗰個觀眾群亦都多咗。以前係七十、八十年代，全部人個消費群都好類似嘅，大家都係新移民，都係內地嚟，勞工密集，大家都要向上努力，電視劇集個 message 好似嘅，姐係獅子山下精神。」直到九十年代初，整體經濟狀況改善不少，中產開始出現，消費群和觀眾群拉闊，衣食足，生活就開始講求品味，消費品連同娛樂項目皆變得更精緻化。「譬如婦女節目要講煮飯，都唔可以好似（一般）師奶咁，要好高貴嘅師奶，所以字體又要襯返個消費群嘅視覺美學。咁如果你話『後生仔傾兩句』嗰啲，後生仔又要講打機、講網上賣嘢，咁佢咪去設計到嗰個視覺感覺好電子化咁。」
於九十年代初，基於這種大環境上的轉變，TVB 開始重視電視標題字，特設一個標題字設計師的職位，造就了張濟仁這類人才。張濟仁為 TVB 標題字設計師，自細醉心於中國文化和歷史，鑽研唐詩宋詞、佛學，同時學寫字、畫國畫、畫水彩畫、畫廣告畫，閒時到訪古廟以及上海街頭小巷，尋索不同古書、古銅幣和古畫等。張九十年代初由上海南來，留意到 TVB 招聘標題字設計師就去應徵，由於他才華洋溢，順利受聘，工作至今，設計了過千款電視標題字。
那這是「香港」視覺文化，還是「中國」視覺文化？Brian 認為其實張師傅正正是香港視覺文化之所以獨特的好例子。「當然佢喺中國嗰種毛筆字有一定嘅根底，但同時間你見到佢有好多西方嘅平面設計，佢都會加埋入去。佢落嚟香港亦都持一個開放態度，知道香港係中西合壁嘅一種文化，咁其實對佢係一種 cultural shock 嚟，咁佢都會跟住轉變。而電視劇每年可能講緊有二、三十套唔同嘅劇類，有武俠傳統，又有現代時裝，又有偵探，咁你個標題點樣去表現到咁豐富、咁大量、咁唔同，咁其實佢就可以靠呢啲文化滋養、文化底蘊，就可以話你呢個係比較現代感，我未做現代感啲，呢個係講傳統、金庸小說，我咪用中國式嘅，咁其實係 ok 㗎喎。咪正正反映到香港好似一個棉花咁，佢可以同時吸收，同時糅合不同文化傳統去呈現新嘅嘢出嚟。」
從字體保育到香港視覺文化
這十年字體保育工作如雨後春筍，字體如監獄體、北魏真書與李漢港楷等等，當中涉及記錄、數碼化和重新設計等工作，各人各施其職。Brian 認為自己屬於記錄者，而不是造字匠，自問「冇佢哋咁有心」，因為就如電腦字體設計，基本日常用語也涉及三、四千字，即使是全職造字，需花費的時間已經要以年做單位，加上香港市場好細，其實很難全職去做。
然而，一座城市的視覺文化組成部分除了字體、設計等內容本身，記錄並且傳播等工作也同樣重要。之前提到每當我們講起字體、字型，腦海會浮起日本、台灣和中國，而非香港，但 Brian 確信這不是由於香港的字型和設計內容本身未夠好，《造字匠》洋洋灑灑幾百頁記錄了七位造字匠，當中字型包括電影標題字、貨車字、牆身廣告字等等，圖文並茂證明了香港出品字體也非常豐富。香港製造於字體市場、字型文化的討論場域缺席，關鍵在於香港過往有人重視、有人記錄、有人去講嗎？
香港人經常羨慕日本，覺得日本的東西就是好東西、好靚，但是這背後只因她們製造的產品高質嗎？若我們細心觀察就會發現日本的視覺文化之所以如此興盛，除了高質的內容，同樣重要的是日本人夠重視自己的文化，日常消費會優先考慮自家出品，亦出版大量刊物去記錄和談論本土文化，「你見我呢度一疊書講字體，大部分都係台灣翻譯，好似字誌咁，其實全部都係嚟自日本嘅。」Brian 苦笑。
Brian 希望自己可以繼續充當記錄者的角色，如書寫《造字匠》時走訪香港未被發掘的造字匠，尋回香港擁有的字型、工藝與視覺文化，透過書籍出版記錄以及傳播這些事物和價值，讓香港人可借此先認識自己的文化，「事實上講緊十年前冇人知係咩嘢嚟，冇人覺得值得研究、值得諗。」問及將來字體保育、香港視覺文化的發展，Brian 帶點期許地說：「首先香港人認識返自己文化係一件好事，搵返我哋嘅價值、搵返我哋自己擁有嘅嘢，以前我哋唔知咩嚟，或者覺得不值一談。再好啲嘅，就唔只北魏體，可以鍾意埋隸書、楷書，我覺得應該多元化，唔同人鍾意唔同嘢其實係好事，唔係一定係北魏體就代表香港，你會樂見原來有個監獄體，跟住又有李伯伯嘅字體，你會發現多咗好多年青人搵佢哋自己認為好嘅嘢。唔一定香港，全世界唔同地區嘅文化佢一定係多面向，只不過係我哋搵下佢有幾多面向，咁事實上每個人喺度掘緊佢心目中嘅香港文化係一個咩嘅情況，咁所以係一件好事。」
聽畢，我自己最大的 take away 是，要守護和建立香港視覺文化，你並不需要讀藝術、讀設計出身。正如保育監獄體的 Gary 也不是讀相關學科，只要有心就可以。有心就自然有份推動力去學去思考，Gary 一開始也有甩漏，但他繼續研習歷史，約設計師前輩做訪問，多番嘗試，之後才慢慢窺探到字體美學的觸覺以及文化歷史的重要之處，而 Gary 現在做出來的成果對香港文化已是功德無量。
撰文、攝影：Frank Lam