我哋今日好日子，開講有話春宵一刻值千金⋯⋯

(卅幾年前一曲Forbidden Colors兩主角齊出嘢. David Sylvian免費醒你新歌, 坂本龍一就Sell你買靜音. 今集仲會講Burial新EP未出碟先出事, 又聽埋Black Dogs推攝影師專用音樂.)

聖誕禮物！David Sylvian贈你十載情已逝Demo

David Sylvian

Tear Me Apart (Demo)

現年63歲自認退休人士的David Sylvian，近年轉行做攝影師及設計唱片封套，喺平安夜突然經由twitters 送禮畀大家，透過旗下SamadhiSound品牌在SoundCloud 的戶口公開「新作」免費任聽。佢話呢首十年前寫嘅《Tear Me Apart》，原本打算作為同女歌手Joan Wasser合作大碟嘅創作基礎，只不過後來感情冇咗，大碟個Project亦冇埋。至於邊樣先邊樣後，我左思右想都冇辦法估得到。講番首歌，風格木結他彈奏伴唱。對於已經N年未聽過佢唱歌嘅樂迷嚟講，呢個聖誕禮物絕對有誠意亦都好窩心。

https://soundcloud.app.goo.gl/1JsgnsTZQrhTA4gRA

一不離二，佢2017年又係突然間無端端發布咗呢一首《Beautiful Country》，製作班底一樣有當時糖黐豆嘅Joan Wasser (即係Joan As Police Woman)。一樣係不收分文畀大家免費聽：

逐粒音NFT未算揾笨  教授「新歌」Sell無聲

Various Artists 

PRSNT

有研究顯示：喺數碼音樂平台普及之後，聽眾即使面對海量即時獲得嘅資訊同內容，但係喺揀選音樂時嘅耐性同專注程度大幅萎縮，有三分一人揀音樂時聽唔到30秒就已經Skip去第二首。基於呢個研究，巴塞隆拿唱片品牌Modern Obscure Music策劃咗呢個名為《PRSNT》嘅跨媒體藝術活動，透過唔同媒體嘅Artist參與表達佢哋嘅睇法，探究數碼音樂嘅未來，籌得款項會捐畀精神病慈善基金。負責搞音樂嘅藝術家，各自用大約30秒時間創作一首作品，部分配以影像表達。喺十幾個音樂家當中，佢哋揀咗坂本龍一負責為大碟埋尾，佢首作品全長亦係31秒，名稱《Silence》，顧名思義言簡意賅存在着無窮無盡嘅虛空，簡單啲講即係玩番John Cage首《4:33》條寧靜橋。負責執導個MV嘅女導演Diana Kunst以往曾經同James Blake及FKA twigs等合作過。喺條片入面，佢想表達：「大家喺別人認定嘅身份下活得未必舒服。現在邀請大家去識別和質疑這社會馴化我們的一切，在你自己之內創造空間和寧靜，讓所有噪音消失，重新與你內在的無限親密聯繫，這是個廣闊的領域勘探。這是走那條路的邀請，脫掉偽裝讓自己綻放吧。」

想聽晒全張唱片？人哋做善事籌款，唔好嘞啩？不過12首音樂，我每首畀30秒你聽吓啦。仲加埋3個video。好未呀？明未呀？

https://modernobscuremusic.bandcamp.com/album/prsnt

疑案繼續！ Burial 最新EP驚現Fake Leak

Burial

Antidawn EP

Burial 打從16年前出道以嚟，無論係有關佢身份、背景嘅謠言同傳聞，跟網絡謊言傳播嘅進化一直同步發展與日俱增。早年先後傳過佢真身係hyperdub 老板kode9、Fatboy Slim又甚至話佢係逃亡緊嘅斯諾登，搞到佢結果要公開自己真名同照片，當然網絡世界亦都始終唔信嗰張相就係佢本尊。今次個世界玩得更加痴線，全張唱片都可以偽造。話說Burial公布咗新作《ANTIDAWN EP》明年1月6號正式出版，但網絡上近排已經有全張唱片流通任你下載。當然，結果發現係偽造，有人將一堆早已流傳而風格有啲似嘅音樂拆做五首長度同官方公布一樣嘅作品，透過網絡徹底地以訛傳訛，不過免費非法Download咗聽咗，即是中咗招，你又可以投訴啲乜？！好嘞，以下呢首，珍珠冇咁真，早兩日至喺音樂廣播網站NTS首播：

Upstairs Flat :

講咗咁耐，嗰啲流嘅音樂係點樣？好多人畀佢整蠱到，睇睇你又點睇？抑話你反而仲鍾意啲？

Strange Neighborhood (FAKE LEAK) :

黑狗創作攝影師專用音樂歌頌粗獷主義

The Black Dog

Music For Photographers

英國Sheffield 電音三人組黑狗借住疫情有空閒時間，實現咗多年來嘅夢想，分別用攝影機拍攝城市周圍僅餘嘅粗獷主義(Brutalism)建築物，仲打算出攝影集。由於拍攝過程來來回回不時出錯，程序重複又重複，為咗要貫徹維持一貫嘅感覺氣氛同創作理念，佢哋決定做一張冇人聲嘅專用音樂唱片，For佢哋由拍攝到編輯照片時應用，一路係咁播住做嘢。順理成章，呢堆「工具音樂」亦衍生咗呢一張大碟。音樂方面，佢哋今次唔係玩ID M，反而傾向用Drone砌環境音樂。雖然呢十幾首「聲音」初初聽好似有啲悶唔知想點，不過如果專注作為工作上面嘅配樂，對於專注同耐性方面據講好有效果。畀首《Norman Foster Knew》嘅Preview MV你睇吓先：

以下呢首叫《Sensor 》，一分鐘Preview MV由佢哋影嘅建築物組成：

都係Preview，《Womersley, Line One 》:

好嘞，全張大碟一炮過