咁搞法仲成世界嘅？ ！
(係喎，今周只講兩張碟咁大把，不過短小精悍。有DG搞電音人重新想像Erik Satie嘅致敬大碟, 又有瑞典妹Lykke Li 情傷四年泡製成嘅新唱片)
DG電音古典致敬系列頭炮：Erik Satie
Various Artists
Fragments : Erik Satie
*講唱片之前，講呢單舊聞先：香港人未必識得呢位法國作曲家薩替（Erik Satie），不過好可能你屋企可以搵到佢嘅相。唔信？我喺藥房買到支「堅登堡克療痰止」咳水，盒面所謂嘅堅登堡德國醫生像，相中人肯定係薩替。至於點解？Errrrr⋯⋯
好嘞，講唱片，德意志古典唱片重鎮DG主催嘅《碎片》計劃，每年揀選一位古典作曲家，再邀請當下唔同嘅電子音樂人「重新想像」再造前人作品，每月發表電子單曲，儲夠12首就結集成大碟推出。DC揀選打頭陣嘅係就快逝世百周年嘅法國作曲家薩替（Erik Satie），諗落實在係不二之選。因為佢當年嘅前衛，到今時今日依然前衛。你絕對可以形容薩替係怪人，佢天才橫溢不善理財但又孤高樂天，喺Cafe酒館做琴師，生活經常要老友接濟，但偏偏喺唔同時期圍住佢轉嘅朋友包括德布西、拉威爾、Stravinsky 、Jean Cocteau 甚至畢加索。除咗佢當年被視為畸型唔知想點嘅曲式影響咗好使流行曲之外，佢分階段搞個人系列衣着形象，睇返變色龍Bowie其實亦只係學師。有關佢嘅怪人怪事，有機會再同大家講。今次DG呢張致敬概念唱片，唔同人會聽到唔同嘢。喜歡坂本龍一、Japan、又或者浮世繪、達明一派嘅你，不妨聽吓下面呢兩首，又睇吓聽到啲乜嘢出嚟？
Gnossienne No.1 – Rework by Monolink :
Gymnopédies – No.3 Rework by Henrik Schwarz|
DG就《Fragments：Erik Satie 》大碟嘅9個Videos :
薩替有幾古怪？當年大眾寫偉大交響曲時，佢廿歲出頭就專注創作一首一首簡短鋼琴獨奏作品，但之後又會突然寫一首咁樣嘅曲，以下呢首《Vexation》列明要連續彈奏840回，平均要廿幾至卅幾個鐘頭先至演奏完畢。都話啦，永遠永遠永遠唔好講男人短！下面呢條友，彈奏《Vexation》就用咗廿四小時，睇怕都破咗YouTube紀錄。嗱，一係唔好睇，一睇要睇晒佢喎：
瑞典傷痕派Indie Pop女王自作業宣洩情傷
Lykke Li
Eyeye
廿幾歲出道時無論形象同音樂都令人眼前一亮嘅瑞典創作人Lykke Li，佢嘅唱片同埋五官都有一種好奇特嘅吸引力。淨係睇佢鍾意聽This Mortal Coil、Velvet Underground 同Leonard Cohen，Terrence Malik 擝佢演《Song To Song》之外，連David Lynch聽過佢嘅碟都要搵佢喺《The Big Dream》專集入面唱主打歌，就知道同我哋同聲同氣啦。大小姐今次呢張唱片，已經係佢2018年以來第一次。過去幾年，佢一直沉溺係之前同唱片監製前夫嗰段失敗婚姻傷痛入面。創作大碟《Eyeye》(發音都係Eye)，佢搵番最初三張唱片嘅監製人Björn Yttling合作玩DIY，用最廉價最傳統嘅器材同咪高峰錄音，希望做出一種真實嘅電影感。個Budget 反而用咗喺拍片方面，吸收咗以往拍嘢嘅經驗，佢搵專人用16米厘菲林創作一系列影像，去講佢唱片音樂聲以外嘅情感。阿妹話現代人用手機睇嘢已經係不能逆轉，所以嘗試將類似三個鐘歐洲藝術電影嘅感覺，濃縮成幾十秒去宣洩感情。睇條預告片先：
第一張細碟《No Hotel》：
Happy Hurts (MV)：
《Carousel 》呢個MV打出晒嚟玩花式，慢慢睇：
又嫌我短？好，成張上：
