Whenever People Agree With Me, I Always Feel I Must Be Wrong.

(今期有腔口超高含氧度法國妹Janie, 坂本龍一「最後」場騷, 大衛寶兒廿年前玩物出土， 仲有大提琴家Peter Gregson用Dolby Atmos試你極限)

新世代法國才女春情蕩漾花花世界

Janie

Toujours Des Fleurs

總會有啲時間，突然間想聽啲金髪法國妹細細聲好似喺耳邊咁唱歌，唔使好靚又唔使好大嘅，總之要吟法文喇。就算自己法文水平未夠小學程度，但係佢有番啲音樂才華曉得作曲寫詞嘅就更加好。啱嘞，今次呢位Janie芳齡26歲，仲算係脆卜卜，出道後被形容為新Françoise Hardy，又話Sylvie Vartan 2號。囡囡多數作品自己彈琴作曲寫詞，歌曲調子簡單易記。佢唱腔含氧度極高，帶啲鼻音又有少少沙啞，唱歌音量剛剛好似喺你耳邊呵氣耳語一樣。飽未？處女大碟入面呢首《Piano Coccinelle》個MV夠晒夏日氣息，Janie 妹妹仲好慷慨咁樣喺泳池打出晒嚟，用兩隻煎蛋冚喺心口，呢啲咪春心蕩漾囉⋯⋯唔講咁細致，我哋聽歌啦！

張大碟其實非常生活化，亦融入咗自己唔同嘅情感。呢首歌仔係寫嚟向已經不存在嘅父親致意，調子旋律好靚。Mon Idole：

佢19歲參加天才表演，已經夠膽用Edith Piaf首《Je Ne Regrette Rien》出戰。正式出第一張相片之前，更公開演繹過前輩Françoise Hardy呢首經典金曲《Messages Personel》：

大碟內另一首大熱Single歌，推出後迅速有500萬串流量，唔講得笑㗎。個MV大玩1970S，兼用番佢成名前嘅卡拉OK MV拍片風格演唱，乘機學吓法文啦喂！

Discothéque 

同一首《的士夠格》，另一個現場自彈自唱版本。Discothéque (Live) ：

佢喺新唱片最後一首歌《Le Prénom de l’amour》入面坦蕩蕩公然冧阿監製Valentin Marceau，講到明阿哥哥仔「以愛為名」，半吟半唱提起William Sheller ，兩個嘢仲即刻合唱番一Part阿Sheller首《Un Homme Heureux》，實在甜到漏，不期然諗起當年France Gall溝Michel Berge嗰單嘢：https://youtu.be/2m1aJ4mHQWo

一年之後  坂本龍一「最後」演奏錄音發表

Ryuichi Sakamoto 

Playing The Piano 12122020

學老夫子話齋「光陰似炮彈」，坂本龍一上年12月12日網上全球直播演奏會，原來眨吓眼就快一年。雖然主辦單位誓神劈願話當時冇錄影，以後冇機會再睇，不過音樂反而就有存檔，亦會喺今年12月12日以唔同形式出版發行。唱片總共有15首作品，選曲有新有舊照顧到唔同嘅樂迷。以下呢首《能源流動》MV，係場騷唯一存在嘅影像作品。

Energy Flow：

新大碟輯錄嘅2020演奏會，亦都係用以下呢一首《Andata》開始。呢度個版本雖然係再之前小小嘅另一次公開演奏，不過大家不妨留意吓教授喺電聲同噪音嘅運用，正到呢！

Andata (Live Version) :

一開始聽邊度停到？如果你未聽過之前《毒水曝光》電影原聲唱片，萬勿錯過以下呢首鋼琴演奏版嘅主題音樂，我夠膽講係佢近年最優美嘅旋律。

Minamata ：

大衛寶兒20年前錄好嘅新作「玩物」出土

David Bowie

Toy

唔知你知唔知道，大衛寶兒早喺2000年時曾經開個網上銀行，叫做bowiebanc，嗰種遠見同埋膽識實在驚人。搞完銀行之後，佢出席Glastonbury音樂節表演之後，帶晒全對樂隊入去錄音室，打算高速錄一張唱片，跟住高速推出市場嚇人一跳。可惜，當時互聯網科技冇依家咁先進，唱片公司高層驚宣傳唔夠又呢樣又嗰樣，結果呢張唱片束之高閣，被形容為「遺失了的唱片」。20年之後，呢件「玩物」終於出土。唱片大部分作品來自佢1960年代嘅舊歌，亦有三首新歌。以下呢一首係1965年作品，聽唔出嗎？

You’ve Got A Habit Of Leaving ：

同樣來自1960年代， 但係20年前嘅編曲同演奏。Karma Man :

唱片入面10幾首歌留返大家慢慢去發掘，喺呢度不如聽吓當時負責聯合監製嘅Mark Plati點樣講返個古仔：

Interviewing Co-Producer Mark Plati on The 《Toy》Album :

藝高人膽大  提琴家全景聲試你極限

Peter Gregson

Patina

來自蘇格蘭嘅卅三歲大提琴家/作曲家Peter Gregson係自己近年一大發現。最喜歡佢「冇有識死」嘅性格，佢飽讀詩書音樂造詣亦高，但不甘於陳腔濫調，不停挑戰自己、唱片公司以致樂迷嘅接受能力。之前Recompose過Bach嘅大提琴組曲之後，第五張個人大碟嘅主題思想希望探討音樂中的Presence Of Absence (存在的不存在)，嘗試要抽走主旋律，改用樂譜入面存在但向來不被重視的「東西」做主角。最搞嘢嘅係，今次張唱片首次用杜比全景聲(Dolby Atmos）技術錄音，企圖全方位360度去捕捉佢心目中唔存在嘅聲音。如果係慕名盲目追求Hi-Fi音效嘅發燒友，肯定聽到一頭霧水。

唱片主題曲《Patina》Official MV :

大碟內被譽為為最優美的一曲《Over》，有人讚嘆意境高超，亦有人話佢完全係嘥時間唔知佢做乜：

《Patina》全張大碟喺度，用乜嘢器材乜嘢耳機去聽杜比全景聲？唔知你喎。